Omupopiliko wopolifi moshitukulwa shaHangwena Warrant Andreas Nghiyolwa okwa ti oumbudi woimuna owa londa pombada moshikandjohoololo shaKongo eshi mwa lopotwa eengobe 200 da vakwa oule womwedi umwe.
Edi Nghiyolwa okwe di popya pefimbo a li ta kumaida oshiwana komutumba wa li komukunda Olukula moshikandjohoololo Okongo oshivike sha dja ko.
Okwa kumaida oshiwana opo shi longele kumwe noovene vomikunda okulwifa oumbudi woimuna.
Opolifi yaHangwena oya ninga omutumba novakalimo vomoshikandjohoololo shaKongo nelalakano lokuyandja ouyelele nehongo kombinga yomayakulo opolifi noimbuluma. Oshiwana sha dja komikunda da yooloka mwa kwatelwa ovaleli vopamifyuululwakalo okwa li sha mona omhito yokupula ouyelele opolifi noshoyo okutopolelafana omayele kombinga nghee oimbuluma i na okukandekwa.
Nghiyolwa okwa ti opolifi otai twikile nokuninga omitumba koikandjohoololo ya yooloka opo ku kwashilipalekwe kutya oshiwana osha pewa ehongo nouyelele kombinga yoimbuluma.
Okwa hokolola ta ti oshikandjohoololo shaKongo osho shimwe sha didilikwa yoo vali shi na ovadali ve hole okuholeka oibofa yomakwatonghonga omanga oibofa imwe hai lopotwa kwa laata.
Onghee okwa kumaida ovadali opo va xulife po okuholeka oibofa yomakwatonghonga molwaashi osha fimana ngeenge opolifi tai lopotelwa pefimbo.
“Ovanhu va ninga oihakanwa yomakwatonghonga nava lopote pefimbo opo va pewe omayakulo opaunamiti diva notashi kwafele yoo vali opolifi i ninge omakonakono noupu,” ta ti.
Nghiyolwa okwa popya yoo vali ta ti opolifi oya lopotelwa kombinga yovanahambo ve na eehambo moAngola tave likufile omadu inava pewa epitikilo omanga vamwe otava tendulula omakove ovanhu.
“Natu longeleni kumwe okukandeka oimbuluma momidingonoko detu,” ta ti.