New Era Newspaper

Icon Collap
...
Home / OvaAngola onghee tava twikile okulandifa omahooli kOshikango

OvaAngola onghee tava twikile okulandifa omahooli kOshikango

2022-01-14  Festus Hamalwa

OvaAngola onghee tava twikile okulandifa omahooli kOshikango
Top of a Page

Ovakwashiwana vaAngola onghee natango tava twikile nokuvakela omahooli moNamibia.

Oshinima eshi sha indikwa kepangelo laNamibia vati otashi ningwa omutenya noufiku kodoolopa yaShikango oyo i li keengaba daNamibia naAngola. 

Ovaangola ohava kala tava landifile omahooli momandini tava tula meetuwa dovanhu omanga vamwe ohava landifa omandini e na omahooli kovanhu opo va ka pungule komaumbo avo.

Okwa didilikwa ovanhu vamwe koitukulwa yokonooli ve hole okuya kOshikango tava ka landa omahooli kOvaangola shaashi oku na ombilixa mokufaafanifa noitaashi hai landifa omahooli moshilongo.

Ovaangola ohava ka tala omahooli koshilongo shavo ponhele i li popepi nOshikango ndele tave uya okuninga oipindi kOshikango.

Odoolopa yaShikango oyo imwe ya didilikwa hai kala i na omangeshefelo oinima ya yooloka ya dja moAngola naashi ohashi xwaxwameke Ovaangola opo va kale ve na ohokwe yokuninga oipindi kOshikango shaashi ovalandi ovahapu.

Mopaife ovanyasha vovalumenhu novakainhu otava monika tava kongo ouxupilo, tava landifa omahooli kondado i li pedu. 

Opolifi moshitukulwa shaHangwena oya ninga eenghendabala okutula po omalandufano ashike omwaalu wovanhu tava landifa omahooli shi he li papitikilo onghee ngaa tau xumu komesho.

Ngeenge Ovaangola ova mono opolifi ohava faduka po va yuka moixwa ve kwete omandini omahooli, omanga vamwe ove hole paife okulandifila koshi yomiti di li popepi nOshikango shaashi ova tila okumonika kopolifi mokati kodoolopa.

Omudo wa dja ko ouministeli woikwamina neenghono oshoyo opolifi oya kala nokuninga oyoongalele kombinga yonghalo yomahooli taa landifwa paumbudi kOshikango ashike onghalo inai lunduluka natango.

Omukulunhuwiliki koshikondo shomahooli mounimisteli woikwamina neenghono Maggy Shino okwa ti ouministeli owa didilika onghalo yOvaangola tava vakele omahooli kOshikango shihe li papitikilo eshi hava kala veli hanena Oshikango tava landifa.

Shino okwa lombwela Kundana ta ti oministeli yavo kai na oufemba wokukala ya kwata po ovanhu tava landifa omahooli paumbudi ashike opolifi oyo i na oshinakuwanifa shokukala ya kwashipaleka kutya ovanhu aveshe tava landifa omahooli momandini ova pewa ehandukilo lopaveta.

Okwa hokolola ta ti ka shi li pauyuuki eshi ovanhu vamwe hava kala tava lande omahooli ndele ihava futu oifendela yokongulu ei hai futwa kouministeli weliko

“Kape na omunhu a pitikwa okulanda omahooli a vakwa ile okulandifa omahooli momandini a dja koshilongo shimwe shihe li papitikilo. Onghee Ovaangola kave na omikanda dokulandifa omahooli moNamibia,” Shino ta ti.

Okwa kunghulila opolifi opo i kale tai kwata po omunhu keshe ta landifa omahooli ile omunhu ou ta lande omahooli a v kelwa moshilongo shaashi otava longifa omukalo wa nyika oumbudi.

“Ovanhu nava xulife po okukala tava lande omahooli a vakelwa moshilongo shaashi eshi osha nyika oulingilingi,” Shino ta ti.

Okwa ti ombelewa yaye otai ka ninga omutumba nopolifi tau kala kombinga yonghalo yokOshikango opo i mone exulilo.

fhamalwa@nepc.com.na


2022-01-14  Festus Hamalwa

Share on social media
Bottom of a page