Kansela woshikandjohoololo shaEtayi Hans Haikali okwa ti oomeme nava fimanekewe efimbo keshe molwashi ova fimana moshiwana.
Haikali okwa yelifa ta ti ovakainhu ohava longo oilonga tai hokifwa ngaashi okutekula ounona komaumbo noshoyo okutonatela ovalumenhun vavo.
Edi Haikali okwe di popya kedimbuluko lefiku lovakainhu la li komukunda Onyelelo moshikandjohoololo shaye mexuliloshivike.
Ovakainhu va dja komikunda da yooloka moshitukulwa shaMusati oshoyo ngoloneya waMusati novanambelewa va dja kouministeli woukashike kookanhu okwa li va ngudumana okudimbuluka efiku loomeme, Haikali okwa tanga oomeme onga omapendafule taa longo oshilonga sha fimana momikunda okulwifa ondjala.
“Oomeme vahapu momikunda ove li unganeka neepolongalama da yooloka ngaashi okulandifa omaxuku noshoyo okutunga oimbale. Onghee elalakano lokumona okamaliwa kokulanda oikulya keumbo,” ta ti.
Okwa kumaida ovalumenhu opo va twikile okufimaneka ovakainhu vavo noshoyo ounona voumati va fimaneke ovakainhu vavo.
Haikali okwa pandula yoo vali ovalumenhu eshi kwa li va fika kefiku ledimbuluko loomeme molwashi otashi ulike efimaneko noukumwe.
Okwa kumaida ovalumenhu opo vaha longele ovakainhu omahepeko oukashike kookanhu unene tuu ounona voukadona ovo va ninga oihakanwa yokukwatwa onghonga.
“Natu longeleni kumwe moshikandjohoololo shetu okukandeka omahepeko omomaumbo. Omahepeko omomaumbo naa lopotwe pefimbo,” ta ti.