TSUMEB - Ovakalimo vomolukanda Kuvukiland modoolopa yaTsumeb otava nyenyeta kombinga yamuni wavo vati a dopa okuandjaneka eepomba domeva da wana molukanda lavo.
Pefimbo Kundana a talela po olukanda lavo mexuliloshivike ova hokolola tava ti molukanda lavo omu na ashike opomba imwe hai tekwa komaumbo mahapu.
Onghee ova ti kutya ohava ende oshinano shile ngeenge tava ka teka kopomba.
Ova hokolola yoo vali tava ti omafimbo amwe opomba ohai teka ashike muni oha kwata efimbo lile okupangela opomba. Olukanda Kuvukiland ola totwa po momudo 2008 noshiwana osha tameka okutula po eebashu davo. Wilibard Nghituwamhata omukalimo womolukanda Kuvukiland okwa hokolola ta ti efimbo keshe popomba ohapa kala peadi ongudu yovanhu va ngudumana ve li momukweyo tava teke omeva.
“Ovanhu vamwe ohava kala tave lidengele omeva molwaashi keshe umwe okwa hala omhito yokuteka.
Ohatu piti eengula dinene twa uka kopomba opo tu fike pefimbo nokuteka omeva diva,” ta hokolola. Omukalimo umwe Ngonyofi Kamati okwa hokolola ta ti opomba yomeva oyo imwe i li eshongo linene la taalelwa molukanda lavo shaashi otava mono oixuna yokuhe na omeva.
Kamati okwa hokolola yoo vali kombinga yomhumbwe youndjuo molukanda lavo.
“Muni ne tu tungile oundjuo onghee paife ohatu ende momialu twa uka moixwa opo tu ke likwafele. Omafimbo amwe ohatu fe omalambo konima yeebashu detu,” ta ti.
Shangela Petrus naye omukalimo womolukanda tuu omo okwa hokolola ta ti ova lulilwa konghalo youmbudi wovanhu tava nyeke ko omaliko avo efimbo loufiku molwaashi molukanda lavo kamu na olusheno. “Ohandi landifa okapana ashike ngeenge okwa laula ombelela yange ohai nyekwa ko,” ta ti.
Okwa weda po ta ti ovanhu ova ninga oihakanwa yokunyekwa omaliko avo ngeenge tava di koilonga omanga ounona voukadona novakainhu ove na omhito yokukwatwa onghonga.
Onghee ovakalimo ova pula epangelo opo li va tungile oundjuo, okuandjeneka olusheno molukanda noshoyo okutunga eepomba domeva da wana molukanda lavo.
Lwopokati opo, ovakalimo ova nyenyeta yoo vali kombinga yakansela wavo woshikandjohoololo shaTsumeb vati iha fiki puvo okupwilikina omanyenyeto avo.
Onghee ova ti kutya momahoololo taa landula ko otava ka ninga elunduko molwaashi itava ka hoolola omuleli ehe na oshisho noshiwana.
Eshi a kwatafana naKundana mayola wodoolopa yaTsumeb Mathew Hangula okwa ti elelo lodoolopa yaTsumeb ola didilika omashongo a yooloka a taalelwa kovakwashiwana vokolukanda Kuvukiland unene tuu oundjuo nolusheno.
“Otwe lipyakidila okukala twa kandula po omukundu ou. Ohatu ka longela kumwe nehangano loNored opo li yandjaneke olusheno kolukanda Kuvukiland,” Hangula ta ti.
Hangula okwa yelifa ta ti omhumbwe yoshimaliwa yokuyandjaneka omayakulo e lixwa po komalukanda oshi li eshongo linene la taalelwa kumuni.
Okwa hokolola yoo ta ti ovakwashiwana otava popi oipupulu kutya molukanda lavo omu na opomba imwe yomeva.
“Otwa yandjaneka eepomba domeva heyali kolukanda Kuvukiland ashike natango ohatu ka tula ko eetenga domeva,” ta ti.
-fhamalwa@nepc.com.na