New Era Newspaper

New Era Epaper
Icon Collap
...
Home / Ovalumenhu va kunghililwa va xulife po 'okulanda' ohole

Ovalumenhu va kunghililwa va xulife po 'okulanda' ohole

2022-07-05  Festus Hamalwa

Ovalumenhu va kunghililwa va xulife po 'okulanda' ohole
Top of a Page

Omupopiliko wopolifi moshitukulwa shaHangwena Sergeant Andreas Nghiyolwa okwa kunghilila ovalumenhu opo va xulife po okukala tava yandje omaliko mahapu kovakainhu manga inava hombolwa.

Nghiyolwa okwa ti ka shili mondjila ngeenge omulumenhu ta putula omukainhu ine mu hombola shaashi omukainhu oo natango ota dulu okufiya po omulumenhu ngeenge a dopa okuwanifa po oipumbiwa yaye.

Okwa kunghilila ovalumenhu ngeenge tava putula ovakainhu vavo opo va kale tava yandje oshiyeleke vo nava yandje tashi di komitima davo.

“Oshapuka oku denga ile nokuli okudipaa omukainhu ngeenge ina hala vali okukala mekwatafano lopaihole naave shaashi kwali wa kondjifwa u putule omukainhu oo,” Nghiyolwa ta ti. 

Nghiyolwa edi okwe di popya Etitano komutumba wovalumenhu wa li kOkongo moshitukulwa shaHangwena.

Omutumba owa ningwa nelalakano opo ovalumenhu va kundafane nghee ve na okuxulifa po oimbuluma moshitukulwa shaHangwena.

Omutumba okwa li wa kwatelwa komesho kopolifi nongudu yokulwifa oimbuluma yoMen and Women Network moshitukulwa shaHangwena.

 “Ovalumenhu nava kale tava kongo omakwafo kovapolifi nokovafitaongolo ngeenge veli hanga ve li moupyakadi novakainhu vavo,” ta ti.

Junias Handjaba mwene womukunda Etundalondjaba, okwa lombwela Kundana ta ti omutumba wovalumenhu owa fimana shaashi otau yandje ehongo louyelele kovalumenhu novanyasha vaha longe vali oimbuluma.

“Otwa pumbwa omitumba edi opo di kale tadi ningwa komikunda da yooloka mOkongo opo ovalumenhu va kale va xwaxwamekwa nghee ve na okukala tava ka konga omakwafo,” Handjamba ta ti.

fhamalwa@nepc.com.na


2022-07-05  Festus Hamalwa

Share on social media
Bottom of a page