Steven Klukowski

KEETMANSHOOP- Ovanafaalama komadu a aveshe kondje yoKeetmanshoop ova fininikwa opo va ye keengolo nokwiilikana komutwe wepengelo omolwa oshikukuta osho tashi tyakaleke moshilongo.  
Ovanafaalama ava ova popya elikwato pomutima lavo pefimbo osheendo shovanambelewa va dja kombelewa yomupresidente vali va talela po oshitukulwa okukonaakona nghene onghalo i li moshitukulwa omo.  

“Ondjele yomeva moshitukulwa oya wa pedu neenghono shaashi omakungulukilo omeva omo twa kala hatu xupu omido nomido okwa kukuta shaashi neudo inatu mona omuloka. Omunafaalama umwe Eric Matthys ta ti. Ta ti onghalo youlifilo moshitukulwa ota i limonikila koinamwenyo yaye oyo tai monika ya utama neenghono komalutu. Matthys ta twikile noku hokolola kutya onghalo oya djuupala unene shaashi ye novanafaalama vakwao ove li moluhepo no itava dulu okulanda oikulya yoinamwenyo. Ta ti meumbo laye ohamu uya ashike oiyemo yoN$2600 komwedi. Ta ti ye okwa wana okupewa omakwafo oikulya noimongwa yoimuna okudilila moshikefa osho sha tulwa po kepangelo.

“Onda kanifa oimuna yange ihapu neenghono omolwa oshikukuta ashike natango ohandi kikimba ngaho naavo va xupa po, ndi na eteelelo kutya onghalo ota i ka nawapala efiku limwe,” Matthys ta popi nenyeme. .
Omunafaalama mukwao, Hendrik Titus okwa lombwela osheendo kutya omolwa omashongo manene omeva momudingonoko ova ya koshikondo shomeva nounamapya opo ngeno va popilwe enota. “Ova ti otava dulu ashike oku tu kwafela nomeva okulongifwa momaumbo, ndele haku nuwa koimuna,” ta fatulula. Titus ta pula opo epengelo li longulule nokupangela eemboola hamano odo di li momudingonoko, noku di tula olusheno olo halu longo keenhe detango.

“Oudjuu mukwao twa taalela oyoo wo womakove e tu a pumbwa okutulwa meedalate dolusheno kombinga yokopate. Oifitukuti paife ota i endaula ashike nomakove noku a kunyuna,” Titus ta ti. Ombinga ashike imwe yoshitukulwa osho  shi na oifitukuti osho shi na odalate yolusheno oyo ya tulilwe ko mo2010. 

Ominista younamapya Omeva nomaluxwa Alpheus !Naruseb okwa fatululila ovanafaalama ava kutya vo ove ya okupwilikina komaudjuu avo vo ve a twale kombelewa yomupresedente ngaashi va tumwa, ko ku talike kutya otaku monika ekwafo la fa peni komaupyakadi oo va taalela.