New Era Newspaper

New Era Epaper
Icon Collap
...
Home / Ovanafikola konooli ve dulife 1 000 ova yandja ohonde neudo

Ovanafikola konooli ve dulife 1 000 ova yandja ohonde neudo

2022-05-27  Festus Hamalwa

Ovanafikola konooli ve dulife 1 000 ova yandja ohonde neudo
Top of a Page

Omupopiliko wehangano loNAMBTS Titus Shivute okwa ti ovanafikola konooli ve dulife 1 000 va dja meefikola da yooloka ova yandja ohonde moshikako shotete neudo.

Shivute okwa ti ehangano lokuyandja ohonde loNamibia Blood Transfusion Service ola kala nokuninga oikonga meefikola nelalakano lokuxwaxwameka ovanafikola opo va kale ve na ohokwe yokuyandja ohonde noshoyo neudeko kombinga nghee ohonde ya fimana.

Onghee okwa ti naashi osha eta opo ovanafikola vahapu va kale va kufa ombinga mokuyandja ohonde. Okwa hokolola ta ti eshi kwa didilikwa kutya moshilongo omu na omhumbwe yohonde inai wana okuyandja kovanhu va pumbwa ohonde, osha fimana opo oshiwana shi kale sha holoka momwaalu muhapu okuyandja ohonde.

Edi Shivute okwe di popya Etine pefimbo eshi a ninga eenghundafa naKundana eshi a hokolola ta ti momwaalu oo omwa kwatelwa ovanafikola 700 va yandja ohonde loshikando shotete onghee eshi otashi u like efano liwa kovanafikola.

“Ohandi kunghilile oshiwana opo shi ye momwaalu muhapu shi ka yandje ohonde shaashi ohonde oya fimana kovanhu ve li momhumbwe yohonde, onghee okuyandja ohonde okwa fimana unene osheshi otashi xupifa eemwenyo dovanhu nokukaleka po ovanhu ve na oukolele,” Shivute ta ti.

Shivute okwa ti ohonde tai yandjwa koshiwana ohai kwafele momikifi da yooloka, nokukwafela yoo vali ngeenge ovanhu tava tandwa ile oomeme tava pulumuna.

Okwa weda ta ti oshiwana nashi topolelafane omauyelele e na sha nefimano lokuyandja ohonde opo ovanhu va kale ve na eudeko kombinga nghee sha fimana okuyandja ohonde.

“Ohatu twikile nokuninga oikonga meefikola opo tu xwaxwameke ovanafikola va kale ve na ohokwe yokuyandja ohonde,” Shivute ta ti.

 Shivute okwa ti ovanafikola tava ka kufa ombinga meetundi domadeulo kombinga yefimano lohonde ottava ka pewa eedjapo konima ngeenge va mane omadeulo avo. Okwa kunghilila oshiwana opo shi twikile okuliufa komilandu edi da tulwa po okukelela ombuto yoCovid-19 efimbo keshe ngeenge tashi ka yandja ohonde

Okwa weda po yoo vali ta ti okuyandja ohonde ita kudengele ndele ota kudi kehalo lomunhu ye mwene.

fhamalwa@nepc.com.na


2022-05-27  Festus Hamalwa

Share on social media
Bottom of a page