ONGWEDIVA - Omukulunhuwiliki wehongo moshitukulwa shaMusati Benny Eiseb okwa kumaida ovadali, ovafitaongalo novahongifikola opo va longele kumwe okukelela onghalo yovanafikola tava ningi omateelelo.

Eiseb okwa ti ombelewa yaye oye shi pondola okukala ya tota po eepolograma meefikola dokuyandja ehongo nouyelele kombinga yonghalafano yovanafikola.

“Ohatu lalakanene okushunifa pedu omwaalu wovanafikola tava ningi omateelelo. Onghee osha fimana ngeenge hatu popi novanafikola vetu momidingonoko,” ta ti.

Okwa ti ovadali nava popye nounona vavo vaha ye moixulo noshoyo okutula po eemhango momaumbo kutya kape na okaana taka i keendingosho.

Eiseb okwa hokolola ta ti oluhepo olo unene tali eta ovanafikola va kwatwe komhepo yokuya moixulo novalumenhu shaashi omunafikola okwa hala oshimaliwa ile a landelwe oikutu.

“Ovadali vamwe ohava yandje po ounona vavo kovalumenhu omanga vamwe ohava kala ve shi shi kutya okaana kaye okomulumenhu womushiinda shavo ashike ihava ningi po sha,” Eiseb ta ti.

Onghee okwa ti ovadali navo otava dana onghandangala yakula mokuyandja omhito kounona wavo va pewe omateelelo.

“Ovadali vamwe ohava futwa koitenya yavo omanga vamwe ohava kendabala okuamena oitenya yavo ngeenge tai ningile ounona omahepeko,” ta ti.

Okwa weda po ta ti ovadali vamwe ohava teya oibofa kopolifi ngeenge ya patululilwa oitenya yavo shaashi hava landelwa mo koitenya.

Lwopokati opo, Eiseb okwa popya yoo vali kombinga yovafitaongalo vati tava i moixulo nounona vofikola, osho sha puka moshiwana.

“Omufita okwa pumbwa okuyandja ehongo kovanafikola nokutwa ovanafikola omukumo ve lihonge nondjungu noshoyo ve likaleke kokule noikolwifa nokuya moixulo,” ta ti.

Okwa ti ombelewa yaye oya didilika yoo vali ovahongifikola ve li mekwatafano lopaihole novanafikola, onghee okwa ti ovahongifikola vamwe otava ulike oshihopaenenwa shii kovanafikola.

“Ehongo lomunafikola ola pumbwa okuyambididwa kovanhu aveshe ngaashi okudja keumbo, kofikola fiyo okovaleli va yooloka momidingonoko. 

- fhamalwa@nepc.com.n