Festus Hamalwa
Ovakalimo vomodoolopa yaTjiwarongo otava ka talika ko tete okupewa eetendelela dekutungululo loshipangelo shaTjiwarongo.
Omunambelewa omukulunhu woundjolowele moshitukulwa shaOtjozondjupa Gebhardo Timotheus okwa ti ovanangeshefa vashona vokutunga omaumbo ovo tava ka pewa tete otendela yokutungulula oshipangelo shaTjiwarongo eshi sha fanekwa shi kale sha tungululwa momafiku e li popepi.
Timotheus okwa ti otatu omukumo ovakalimo vomodoolopa yaTjiwarongo opo va longife omhito ei va ninge omaindilo vo va talike ko tete okupewa oilonga ei yokutungulula oshipangelo.
“Ovanhu avashe ava ve na ehalo okuninga omaindilo opo va mone omhito yokutungulula oshipangelo nava kale ve na eembapila da yela nawa. Omuningi weindilo okwa pumbwa okukala a dja modoolopa yaTjiwarongo,” Timotheus ta ti. Omuwililki woundjolowele ou okwa popya kutya elalakano lokupa omhito ovakalimo vomodoolopa Otjiwarongo osheshi kutya okwa hala a yadje omhito yoilonga kovanhu vopopepi unene tuu ava ve li modoolopa omo mu na oshipangelo eshi tashi tungululwa. Ta weda po kutya naashi otashi xumifa omwaalu wokuhe na oilonga pedu modoolopa. Etungululo loshipangelo ola kwatela mo okutula mo omalamba mape, okulonga eepaipi domeva nosho tuu.
Yee ta yelifa kutya oshiwa ngeenge omhito ei tai pewa ovakalimo vomeni lodolopa yaTjiwarongo shaashi ovanhu otava dulu okulonga noudinini ngeenge veshii mo nale momudingonoko woshipangelo.
Pexulilo okwa kumaida ovanhu ava tava ka mona oshinakuwanifa shokulonga oshipangelo opo va longe nelitulemo nokukwashipaleka kutya ottava longo oilonga yongushu.