Omukulunhuwiliki mouministeli wouhaku nonghalonawa Ben Nangombe okwa ti ovanhu ve li moshipangelo ve li monghali ii, mwa kwatelwa ava ve li ko-ICU, ova va inava tunhilwa.
Nangombe okwa ti ouministeli owa didilika omwaalu wovanhu tava kwatwa kombotu omafiku aa inava tunhilwa naashi ohashi eta opo va tonwe kombuto.
Okwa hokolola ta ti ovanhu onghee ngaho natango tava twikile okukwatwa kombuto nomoshilongo otamu lopotwa ovanhu vape va kwatwa efiku keshe.
Nangombe okwa ti osha fimana ngeenge ovanhu aveshe ova tunhilwa, unene tuu pefimbo eli Namibia a talela ekufikufi etine lombuto yoCovid-19.
“Oministeli yetu otai lalakanene okukaleka po eameno loshiwana opo shi hakwatwe kombuto nokukeelela omafyo tashi pitile mokuninga oikonga yetunhilo lombuto,” Nangombe ta ti.
Ben okwa ti ovanhu ova pumbwa okukala va tunhilwa diva manga ekufikufi etine inali fika moNamibia opo va kale ve liamena pefimbo.
Okwa ti omwaalu wovanhu tava kwatwa kombuto owa shuna pedu mokufaafanifa neemwedi da pita eshi kwa li oshilongo sha didilika omwaalu muhapu.
Nangombe okwa ti ouministeli wouhaku ou na omiti da wana okutunhila oshiwana opo shi kale sha mona omhito yokuvendwa.
Okwa ti ovanhu nava topolelafane ouyelele kombinga yefimano lovenda yoCovid-19 opo ovanhu va kale vena eudeko la wana lokukala va ka tunhilwa.
“Ookansela, oveene vomikunda va twikile okuninga oikonga kombinga yetunhilo yombuto ei opo oshiwana shi kale sha xwaxwamekwa okukala shi na ohokwe yokutunhilwa,” Nangombe ta ti.
Okwa ti ovanhu nava twikile okuliufa komilandu doCovid-19 efimbo keshe shaashi omukifi ou owa nyika oshiponga neenghono.