Ositola Pep oya imanga uukuni kumwe nOmulunga Radio okuyambindhindha aalongwa mboka ye na onkayi nenge kaaye na omizalomo dhosikola miitopolwa iyali yokonooli.

Aalongwa yomiitopolwa Oshana oshowo Ohangwena okwali ya ningi aanelago sho ya yambindhindhwa nomizalo ndhi ihwapo, ndhoka kwali dha koho oshimaliwa shi thike N$10 000.

Ositola Pep oshowo Omulunga Radio okwali ya gandja omizalo ndhoka tango kaalongwa yeli 51 yokOnaushe Combined, mehuulilo shiwike.

Ngoloneya gwoshitopowa shaShana Elia Irimari okwa ti shoka sha longwa komahangano ngoka gaali osha simana no tashi ka ndhana onkandangala moonkalamwenyo ndhaanona mboka ya ningi aanelago.

“Shoka itashi ka lundulula ashike onkalo yaalongwa, ihe otashi ka yambindhindha wo aalongwa ya itulemo miilonga yawo yosikola,” ta ti ngaaka.

Ta gwedhapo ta ti, aalongwa yamwe oya zi momagumbo moka kaamuna iiyemo ya gwana, okuya gwanithilapo ashihe taya pumbwa, ihe epangelo itali ka vula wo okugwanithilapo ayihe, aanona ayehe ya taalela omaupyakandhi gatya ngaaka.

Ta ti, ndika ethano ewaanawa, nkene omahangano ngaka gaali ga tsakaneke epangelo ondjila kati, oshoka itali vulu okugwanithapo oompumbwe  dhaalongwa adhihe.

“Mbaka oyo aaleli yetu yomonkuyiwa, ihe opo ya gwanithepo omayithano gawo, ongele taya yambindhindhwa wo natango  ya kale yena omukumo yonakuyiwa,” ta fatulula ngaaka

Irimari okwali a kumagidha wo aalongwa ya ka tsikile okwiilonga opo ya pe aayambindhindho yawo omukumo, ya tsikile okuya kwatha natango.

Omukuluntu wiliki gwositola Pep, Jakkie Coetzee okwa ti, okwali ya yambindhindha ngaaka omolwa olukeno oshowo onkalo ya fatululilwa, aalongwa oyendji ya taalela.

“Kehe okanona okaNamibia okapumbwa okukala ka nyanyukwa, opo ka vule okwiitulamo meyilongo lyako,” ta ti ngaaka.

A gwedhapo ta ti shoka oye shiningi no taya tsikile okushininga.

Omuniilonga gwoRadio Omulunga Radio Maria Namupala esiku ndyoka okwali a fatulula kutya, okwali ya yambindhindha ngaaka sho kwali ya ndhindhilike onkalo yuunona hawu kalo muyo, unene pethimbo lyuutalala.

“Otwa kala noku kundana nkene aanona kaayena omizalo dhosikola ndhiihwapo haya kala pethimbo lyuutalala, oshoka itaya vulu okuzala iikutu yawo yopaumwene,” ta popi ngaaka.

Onkalo ndyoka ohayi shololitha notayi vulu okunkundipaleka omandhilandhilo gomulongwa.

vkaapanda@nepc.com.na