WINDHOEK-Omupresidente gwoshilongo Republic of Guinea Alpha Conde okwa talele po Namibia shina sha nomakwatathanolongelokumwe pokati kiilongo mbika iyali Etitatu lyoshiwike shika .
Conde okwa enda pamwe noominista dhe dha yooloka opo dhi ye dhi vule okushaina omikanda dhelongelokumwe noshowo omakwatathano miikondo ya yooloka ngaashi , omudhingoloko , oomina noshowo iipindi.
Mboka ya shaina pamwe noominista ndhika ndatu, oominista dhaNamibia , Tom Alweendo ngoka a zi koshikondo shoomina, Pohamba Shifeta koshikondo shoomudhingoloko noshowo Tjekero Tweya ngoka a kalela po iipindi.
Ta popi pethimbo ndyoka lyetalelopo, minista yiinima yopondje nomakwatathano gwokondje yoshilongo Netumbo Nandi Ndaitwah okwa hokolola kutya oominista dhiilongo mbika iyali odha ninga omapekaakapeko ngaashi naanaa ya li ya pulwa opo ya ninge omakwatathano pokati kiilongo mbika iyali.
Okwa ti kutya okakomisi komakwatathano pokati kiilongo mbika oka holoka momasiku 6 sigo ga 7 gaMai noga goolwa nawa oya tala woo iinima mbyoka ya li ya pulwa okuninga kupresident ngaashi uukumwe pokati kiilongo mbika ngaashi sha li sha ziminwa pokati komukokolipresidente gwa Namibia nomukokolipresidente gwaGuinea.
Okwa hokolola kutya shika osha tala iinima mbyoka unene miikwaliko noshowo miikwapolitika, nomiikwapolitika opwali pwa ningwa eziminathano kutya iilongo mbika nayi tsikile okulongela kumwe noshowo okukala tayi tinathana omilandu mwaashoka.
“Otwa tsa kumwe kutya natu indjipaleke omapeekapeko nomakwatathano pokati kiilongo yetu noshowo uukumwe. Na otuna oku kala tatu shingi pamulandu gwoAU noshowo okulonga aagundjuka yiilongo yetu nkene ye na okukutha ombinga meliko noshowo oondjokonona yiilongo mbika,” Nandi-Ndaitwah a hokolola.
Okwa tsikile ko woo tati kutya oya zimine kutya na pukale omataambathana gwomauyelele noshowo omakwatathano gwopaipundi ga kola.
Ashike omupresidente Geingob okwa hokolola kutya ye okuli u uvite uunambano netumba sho kuume ke miilonga a tokola opo a taalele po oshilongo shika palweendo lwopapangelo na okwe mutaambako noonkondo.
Conde okwa tegelelwa oku ka kala ishewe a ka talela po oofabrika dhoohi koshitopolwa shErongo noshowo oomina moshilongo. Okwa hokolola kutya ekwatathano pokati kiilongo mbika lya kala po nale na nali simanekwe.