Ehangano loRoad Authority ola patulula oupate vomamanya veli omuwoyi moshitukulwa shaNdola, ovo unene va yuka keefikola noukoupangelo moshitukulwa.
Eepate oda dungwa koshimaliwa sheemiliyona N$94.2 melongelokumwe nombaanga yaGermany.
Kansela woshikandjohoololo shaNdola Fernand Shifidi oo a li a pandula neenghono okwa ti odula ngeenge ya pimbile ovakalimo vomEndola ovali hava mono oixuna shaashi eendjila hadi patwa kefundja.
Shifidi okwa ti ovanhu mwa kwatelwa ounona vofikola, noomeme veli momateelelo ohava ende movema efundja ngeenge tava ka konga ouhaku koitukulwa ya yooloka ile ngeenge ovanafikola tava i keefikola.
Kansela ta ti eefikola dimwe ohadi pate shaashi ounona veli meendodo dopedu ihava dulu okutauluka omeva.
Onghee a weda po kutya okwa pandula unene eshi oshikondo sheendjila shi na oshisho noshiwana shili momhumbwe nosha kwashipaleka kutya oshitukulwa shaye nasho osha mona yo eepate.
Okwa ti ovanafikola, ovahongifikola novakalimo aveshe yomomudingonoko waNdola itava ka mona vali oixuna nokukala tava tavakana moyana iyadi omeva shaashi paife ova tungilwa eeptate.
Eepate oda longwa okudja moHangwena fiyo okoshitukulwa shaMusati da kwatafana neefikola dihapu noupangelo momikunda.
Moshipopiwa shaye omukulunhuwiliki moRA Conrand Lutombi okwa ti ehangano laye otali twikile nokuyambula po eepate koitukulwa yayooloka moshilongo.
Okwa ti natango oRoads Authority okwa tula moilonga eepate dihapu opo di kale da longwa okutameka momudo tau ya koitukulwa ei yadidilikwa ina oshiwana nasho shili momhumbwe yeepate ngaashi oshitukulwa shaKavango.
“Ngeenge koitukulwa oshilongo shi na eepate dili pashinanena eshi otashi yambula po eliko, tashi pitile movanangeshefa va yooloka ngeenge tava longifa eepate okukala tava ka ninga eengeshefa peenhele edi dina eepate diwa nokueta omayakulo popepi noshiwana,” Lutombi ta ti.
Okwa ti pefimbo eepate da longwa ovanhu 1118 okwa li va pewa eemhito doilonga ya yooloka.
Eepate oda longwa komahangano atatu omoNamibia, ehangano Ondjove trading cc, Eponga trading cc noMaza trading cc. – fhamalwa@nepc.com.na