Kansela woshikandjohoololo shaKongo Efraim Shipindo okwa pula omalelo opamufyuululwakalo opo a yandje edu kovanyasha va kale tava ningi oinyangadalwa younamapya.
Okwa ti osha fimana ngeenge ovanyasha tava kufa ombinga mounamapya opo va dule okushakeneka epangelo ondjilakati nokulwifa ondjala noluhepo tashi pitile mounamapya.
Shipindo okwa ti ombelewa yaye oya didilika ovanyasha vahapu ve na ohokwe yokuninga oikunino yavo ashike vahapu kave na sha onhele yedu yokuningila oikunino.
Pefimbo Shipindo a ninga eenghundafana naKundana okwa hokolola ta ti ounamapya owa fimana shaashi ohau dulu okuyambula po eliko loshilongo ngeenge ovanhu tava landifa oikunomwa ile oimuna yavo.
“Eefikola nado oda pumbwa okupewa edu opo ovanafikola va kale tava longo oikulya yavo vene okupitila moinyangadalwa yoikunino,” Shipindo ta ti.
Shipindo okwa ti oveene vomikunda nava kale ve na ohokwe kombinga nghee ounamapya wa fimana kovanyasha opo vaxwaxwameke nokuyambidida ovanyasha okukala tava hambula po oikunino yavo.“Ngeenge ovanyasha ova pewa edu lounamapya, vahapu otava ka eta po eemhito doilonga eshi tava ka kuta vakwao va longe moikunino younamapya,” Shipindo ta ti.
Okwa weda po ta ti nonghalo yovanyasha yokulonga oimbuluma ngaashi okuvaka po omaliko ovanhu otai shuna pedu shaashi ovanyasha otava kala veli pyakidila okulonga moikunino yavo, vo va dule okulimonena oyuuyemo.
Okwa kunghulilia ovanangeshefa, omahangano opaumwene novaleli vopapolitika opo va kale tava yambidida oinyangadalwa yovanyasha.
“Ovanyasha longeleni kumwe, kaleni ta mu longo nodjungu nokukala tamu topolafana omayelele,” Shipindo ta ti.