Omukadhona omugundjuka gwedhina Susana Mathias (26), okwa ti ita vulu oku tegelela oku pewa peke kepangelo omanga e na omadhidhilo noonkondo e dhi pewa oshali, ta vulu oku ilongela opo a mone iiyemo.
Mathias, oha opaleke aafuko miipala oshowo kehe ngoka e na oshituthi, nenge a hala oku owal opala moshipala (make-up) oshowo okupanda.
Ta ti ota ithanwa kutya ye onkulungu oshoka mesiku oha vulu oku opaleka aantu ya pita po 20 ashike ka pe na ngoka he mu galukile nenyenyeto kutya ina ningwa nawa, ihe onomapundulo ashike.
Ta hokolola ta ti, ina hita osikola yokumake-up, ashike shoka oshitalendi eshi pewa kuPamba. Ta hokolola kutya okwa dhimbulula oshitalendi she ethimbo eli mosikola. Pethimbo mpoka ka li e na ilongitho ayihe, ihe okwa kala teshi enditha nawa, nookume ke oya kala nokumutsa omukumo kutya ye onkulungu.
Ta ti, oshidhigu okukala wa tala kiipala yaa kuluntu yoye, oshoka siku limwe ona ye ke kuthiga po ngoye owu ka mone iihuna oshoka kushishi oku nyangadhala. Shihwepo wu nyangadhale omanga kuyele nongele wa nyengwa to kwathwelwa.
Mathias okwa ti okwali a tameke okuninga ongeshefa ndjoka mo2016, ashike mokati komvula okwali a sholola, ihe nani oshinima ngele oshoye oshi na ashike oku thika pu ngoye.
Omvula ya zi ko tate gwe gwopambepo mongeleka yawo, okwali e mu tsu omukumo opo a tsikile nokulonga ilonga ye mbyoka sigo onena tayi ende nawa.
Ta ti ngaashi ngeyi oku uvite kutya ye, omunageshefa gwoshili oshoka okuna iiyemo yimwe tayi ya po, tayi zi mongeshefa nonande natango okuna iiyemo yiilonga ye mbyoka hamono komwedhi.
Ta gandja eyeletumbulo ta ti, sho haku popiwa kutya lumoho ilonga omanga kulyo e na oonkondo, oshi na shoka tashi ti.
Mathias ta popi nomuthindo ta ti, kape na omuntu a valwa omukwanaluhepo ihe oluhepo ohaluya oshoka aantu inaya hala okulonga, ihe kapena ngoka tekulongele ngele ito thikama ngoye mwene.
“Otandi kumagidha aanyasha ayehe mboka ya kuutumba momagumbo kutya, naya dhiladhile kutya oya pewa omagano gashike, taya vulu okugalongitha opo ya ete po iiyemo ya vule oku ihupitha yo yene. Oshimaliwa sho kutameka ongeshefa hasho eipopilo nande, aantu ohaya kwathelathana,” Mathias ta kumagidha ngaaka.
Ta ti kena ehala lyokulongela ookasitoma dhe, omolwa iiyemo inayi gwana natango, ashike ota ti moomvula ntano twa taalela okwa thaneka ehala lye lyokulongela lyi na inima ayihe.
Ta ti okuna ohokwe yokulonga kehe ngoka taka landula onkatu ye, oshoka aniwa ngele to gandja natango oto mono oshindji, shivulithe sho wali wuna nale. Ano onsteyo nayo otayi ende ya uka pombanda.
Mathias okwa ti, okuna ohokwe yo kulonga nuudhiginini, opo woo a fe aanengeshefa aanene, ihe ehala oshowo ilongitho mbyoka inayi gwana oyo ashike uupyakadhi. Ta ti ngoka e na ehalo lyokumukwatha a hume komeho oteke mu pandula lela.
“Aanyasha yo paife otwa hala oku ningilwa kehe shimwe, omanga thimbo limwe tatu vulu okulonga noonyala dhetu, tu ikwathe tse yene, ihe kehe shimwe otwa hala ashike epangelo li tu ningile,” Mathias ta ti ngaaka.
Ta hokolola ta ti, ngele owa tegelela okuningilwa nenge oku pewa ongweye mwene to ishunitha monima nethimbo lyoye to mana po.
Ta ti, oku na eitaalo kutya kehe shimwe otashi vulika, ngele owuna omukumo, oonkondo nehalo lyoku shi ninga shili.
Kookasitoma dhoka natango dhina ehalo lyoku opalekwa nadhi dhenge konomola 081 601 8375.