“Ihandi kofa vali nawa eshi nda uda kutya elelo lodoolopa yaOutapi ola hala okulanda po epya lange kondado i li pedu. Ohandi kala handi hepekwa komadilaadilo okulimangeleka shaashi paife onda lulilwa kutya ohandi uka peni nounona novatekulu vange. Onghee kandi na vali ombili yokomwenyo eshi handi kala handi kwena efimbo alishe.
Aa omatumbulo aEveline Kanutus weedula 65 ta hokolola nghee a udifwa nai kelelo lodoolopa yaOutapi eshi la hala okulanda po epya laye e li fiilwa kuina eshi a xulifa omudo wa dja ko muDesemba.
Omukulupe okwa hokolola ta ti epya okwa li laina ou va kale naye meumbo omo oule wefimbo lile okudja kounona manga vashona ashike vamwaina va dalwa navo ohava kala ve li koushimba vati eshi va fiya po omukulupe.
Pefimbo Kundana a talela po eumbo lavo mOutapi okwa hokolola ta ti epya okwa kala nale e li pewa po kuina efimbo kwa li e li momwenyo eshi a fiya a shanga momambo kutya ngeenge okwa fi epya nali ninge laye.
“Pefimbo meme a kala e li momwenyo okwa li a lombwelwa kumuni kutya okwa hala okulandifa po epya ashike okwe shi anya kutya epya laye itali landifwa po shaashi omo ha xupu ngeenge a lima oilya yaye,” ta hokolola.
Okwa ti efimbo ina e li momwenyo okwa kala ta hepekwa komadiladilo eshi a kala ta popi kutya muni waUtapi okwa hala okuvaka po edu laye shaashi e wete kutya okwa kulupa.
Okwa weda po ta ti omukulupe ou e va dala okwa li yoo vali a yandja edina laye keembelewa damuni opo eumbo li kale kedina laye.
“Konima yeefya dameme eshi da hanauka ovamwameme vaye keembelewa damuni opo va ka xwaxwameke ovanambelewa kutya epya eli nda fiilwa kumeme inali pumbwa okuya kedina lange shaashi vati navo ova hala okutopolelwa oshimaliwa tashi futwa kumuni. Onghee okudja opo ngeenge handii keembelewa damuni, ovanambelewa ohava anya opo epya liye kedina lange,” Kanutus ta hokolola.
Okwa hokololela Kundana ta ti muni okwa hala a lande po epya N$100 000 ashike yee nounona vaye ova nya okutambula oshimaliwa osho shaashi oshishona unene nokuya mepya lakula.
“Muni okwa hala okukengelela nge shaashi e wete kutya ame inandi longwa onghee paife nomumwamememati okwa ya keembelewa damuni ta popi oipupulu kutya epya olaye vati e li pewa kumeme manga kwa li e li momwenyo,” ta hokolola.
Okwa ti paife ke na vali ombili novamwaina eshi paife navo va hala opo oshimaliwa shi topolelwe ovana novatekulu vanakufya.
“Meumbo omo itandi di mo, eli eumbo lange nde li fiilwa kumeme onghee shapo otashi pula omwenyo wange opo ndi dje mo meumbo omo,” Kanutus ta hokolola.
Okwa ti meumbo omo oha di mo nounona vaye vatano novatekulu vatatu yee ta weda po ta ti ngeenge epya ola landifwa po ota ka dja peni paife noludalo laye.
Okwa indila ouministeli womadu nomhangu yopombada opo u kale wa ya mo eenyala moshikumhungu eshi opo omukundu ou u kale wa kandulwa po diva.
“Ngeenge muni okwa hala nda dja mo meumbo omo oku na okupa nge tete epya lakula opo ndi dule okukala handi limi oikunomwa yange ngaashi naanaa nda kala handi limi mepya eli nda fiilwa kumeme,” Kanutus ta ti.
Okwa weda po ta ti elelo lodoolopa yaOutapi ohali kala ashike tali yandja omayakulo kovanhu vovakengeli ashike ovafyoona ihava yakulwa ngeenge ve na oupyakadi.
Meenghundafana a ninga naKundana omupopiliko wodoolopa yOutapi Filipus Shililifa okwa ti Kanutus ina hala okulongela kumwe novamwaina opo epya li landife po vo va dule okutopola oshimaliwa.
Okwa ti mumwainamati umwe naye a dalwa kunakufya ova dimina opo epya li landifwe po ashike oupyakadi ou li kuKanutus ou a hala okupewa epya oye ayeke shaashi e li fiilwa kuina vati.
Okwa ti muni okwa kendabala loikando ihapu opo a yandje etomenho komukulupe pefimbo e li momwenyo opo a pewa oshimaliwa shepya laye ashike Kemanya ku dja ondwi.
“Muni ina longifa eenghono kutya Kanutus mepya a taatawa mo ashike fyee okwa li ashike twe mu lombwela kutya eumbo lavo oli li unene popepi nodoolopa onghee okwa pumwa okudja po shaashi muni okwa hala okutunga po ponhele opo,” Shililifa ta hokolola.
Okwa ti elelo lodoolopa inali ama kumwe novamwaina vaKanutus opo a kale a kufwa epya laye onghee okwa ti ombelewa yavo itava wana pokati konima yomapata.
“Fyee otwa teelela ashike ovakwapata opo va mane okukundafana kutya epya otali i kedina lalye opo fye tu dule okufuta oshimaliwa komunhu ou a tu ka pewa edina laye kovakwapata shaashi paife ounona vanakufya aveshe otava kondjele okupewa oshimaliwa.
Okwa weda po ta ti muni okwe lilongekida okukala a futa oshimaliwa shepya efimbo keshe ngeenge Kanutus va mane okulongela kumwe novamwaina.
Umwe womovamwaina vaKanutus a dalwa naye kunakufya okwa anya okutya ko sha koshimungu eshi.