WINDHOEK-Omuwiimbi omukiintu ngoka e li ta imbi oongalo tadhi dhana onkandangala konyala moshilongo ashihe gwedhina Monika Pinias, nokwa tseyika nawa onga Top Cheri, ota tseyitha ovidio yongalo ye yedhina Johnny, ongulohi yOlyomakaya ndjika. 

Okavidio haka otaka ka talika tango pehala lyokunwa nokulya lyoThe Garden Inn13, moka Top Cheri ta ithana aaholi naalanduli yoongalo dhe komapandja gwointaneta opo ya kale ya holoka mengathithi enene nok nyanyukwa pamwe pethimbo lyeuliko lyovidio ndjika oshikando shotango. 

Okavidio kongalo Johnny, ndjoka yi li ponomola ontiyali moalbuma yaTop Cheri yedhina Fertile, ota ka kala okatitatu ka ningwa kuTop Cheri okuza moalbuma oyo tuu ndjoka, ya li ya piti omvula ya zi ko, nokwa li ya tseyithilwa koWalvis Bay.  Oalbuma otayi popi kombinga yokupondola sha, noku eta po oshinima shoka omuntu a longa nuudhiginini.
Oalbuma ndjika oyi li ya ningwa omikwelengendjo kuMr Andrew, M-Jay, Glo noHouse Guru Gang mboka ye li ya kala noku mu kwathelwa. 

Moalbuma yaTop Cheri ndjika yi na omaimbilo ga adha 14, omu na ngoka taga inyenge nawa, noga kala nokulilithwa mpaka naampeyaka. 

Otamu adhika eimbilo lye lyotango lyedhina Victoria, moka ta kwathelwa kuDion. 
Eimbilo ekwawo ongaashi Danisa, ndyoka kwa li lyi na okavidio okawanawa. 
Omaimbilo omakwawo ongaashi Hangover ndyoka a imba pamwe naahikingalo yamwepo yokongundu ye yoku imba ngaashi King Elegant osho woo Athawise.

Moalbuma muka Top Cheri oku li ishewe a imba pamwe naahikingalo ngaashi Adora osho wooTate Buti, okutula mo omulyo gwoongalo gwoopala.

Ngashiingeyi Top Cheri oku li a ipyakidhila noku ulika nokutseyitha omaimbilo ge moshilongo ashihe, noku li ta tsikile nokuthaneka uuvidio owundji.