Omuhikingalo Maria Tuna-Omukwathi, a tseyika nawa nedhina Tunakie oshowo kuume ke kopothingo Pamela Nangolo oya thindikilwa kengathithi lyookuume naamwayina kegumbo lyawo lyaaluhe mOlyomakaya momukunda Elim moshitopolwa shaMusati.
Omuhikingalo ngoka okwa tseyika nawa sho a li a sindana omapapa ga yooloka omolwongushu yoongalo dhe, nokwa li i iluku “Otyaka”.
Tunakie okwa hulitha momasiku 24 gaApilili sho a li anuwa a ihata po nokusa mehala lye lyomangeshefelo moshishiindalongo South Africa, nokwa hulitha mepipi lyomimvo 39.
Sigo onena kapu na uuyelele wothaathaa kutya oshike sha eta eso lyomuhikingalo.
Tunakie okwa thigi ko aanona ye yatatu, naamwayina yatatu.
Omuhikingalo ngoka kwa li ha dhana oongalo dhopamuthigwululwakalo okwa li a valelwa moAngola.
Otyaka oya kala onkulungu mokwiimba okuza kuushona we. Aakuluntu okwa li ya tembukile moNamibia omanga e na omimvo hetatu. Tunakie okwa li a tekulwa kuyinakulu momukunda Ontananga. Okwa li a tameke oku imba nokudaanisila ongundu tayi ithanwa Kakulukadhi mungunda.
Tunakie okwa li a dhimbulula oshitalendi she shokwiimba sigo a li a ningi oshilyo shongundu yoongalo mOshakati momumvo 2004.
Otyaka okwa li ya hiki okangalo kotango kedhina “Wameme” hoka ka li ke mu sindanitha epapa lyotango koSanlam Music Awards.
Onkalamwenyo yaTunakie okwa li ya ende tayi lunduluka nokwa li a tembukile kuushimba, hoka a li a ningi okwiimba onga oshitopolwa shonkalalmwenyo ye.
Momumvo 2005 okwa li a pititha oalbuma yedhina “Ombwila” tayi landulwa koalbuma “Going back to my roots” mo2008.
Momumvo 2014 Tunakie okwa li a sindana onga gumwe gwomaahikingalo dhingi moAfrica gwokomumvo, kegandjo lyomapapa goongalo lyoKora Music Awards.
Tunakie okwa li wo adhana oongalo kiilongo ngaashi ko-US, UK, Czech Republic,Spain oshowo Australia.
Eso lyaTunakie lyombaadhilila inali halutha ashike aakwanezimo nokuume ke, ihe olya halutha wo aahikingalo pamwe naye.
Yinagona gwaTunakie, Angie Namupala esiku ndyoka okwa ti, oku uvite ondjo oshoka ina dhana onkandangala ya gwana, onga yina yaTunakie, ihe nena okwa hula ko.
“Otandi kumagidha aakuluntu ya simaneke ekalekepo lyaanona yawo nokuyapa ohole ya gwana onga omuntu nomwana,” a popi ngaaka.
Namupala okwa tangumuna Tunakie onga omukiintu omuvuliki, gwomwenyo omwaanawa noku na ombili.
Omuhikingalo pamwe naye, D-naff, okwa popi esiku ndyoka ta ti, oye na omapulo ogendji, noya inekela kutya esiku limwe otaya ka mona omayamukulo gomapulo gawo.
“Tunakie omumwameme ye okuume kandje. Otwa kala mekwatathano ewanawa okuza esiku twa tseyathana oshoka okwa li tu na uukuume woshili,” a popi ngaaka.
D-naff okwa gwedha ko nokukumagidha ta ti, hakehe gumwe to yolo naye okuume koye, yoololeni ookuume yoshili noyiifundja.
Tunakie okwa li athindikilwa kokuume ke oshowo kaahikingalo ngaashi D-naff, Setson, Panduleni Choir, Atushe, Lukasbasta, Fidel, Lady Dyla, Christmas, Peya, M &N Jonson, Lady -J, Khamasutra, Yashe Ta ti Pii, naRicardo.