Ehangano loTwins Association Namibia otali ka yandja omakwafo kovadali ve li moluhepo ovo ve na ounona veehamba.
Ehangano ola totwa kovanyasha va dalwa eehamba Tuhafeni naJansen Andreas nelalakano opo li kale tali yambidida nokufila oshisho ounona voukwanambwiyu ile ounona velongo moshilongo ashishe.
Pefimbo a ninga eenghundafana naKundana Andreas Tuhafeni omutotipo wehangano loTwins Association Namibia kwa popya ta ti okwa didilikwa ovadali vounona veehamba ile elongo hava kala ve li meshongo linene lokukala tava file oshisho ounona vavo. Okwa ti unene tuu ovadali ihava longo ovo vamwe va didilikwa hava kala tava li tava pi shaashi kave sha oyuuyemo yasha yokuyambidida ounona.
Andreas okwa popya ta ti ehangano lavo otali kala tali yandje omakwafo kounona ngaashi omashini, omilambo, oidjalomwa, onhele yokudja, oshimaliwa shokuya koshipangelo nosho tuu omakwafo akwao a yooloka.
“Onda didilika ounona vamwe veehamba va fya kodjala shaashi ina yokaana ita dulu okuyambidida okaana, molwoo oluhepo nondjala a talela,” Andreas ta ti. Okwa yelifa ta ti omakwafo otaa ka pewa ashike ovadali vehe na oilonga ile oyuuyemo yasha.
Andreas okwa ti ehangano lavo otali ka kala li na omukalelipo vopaveta opo a kale ta amene ounona vaha ningilwe omahepeko omomaumbo ile okuningwa okatongo. Okwa fatulula ta ti elalakano lomukalelipo wopaveta okukaleka po eameno lounona, nokukwashipaleka kutya ounona veehamba navo otava talika ko ve fike pamwe.
“Mopaife ngaha katu na sha ombelewa shaashi ehangano letu olipe natango, ashike otwa faneka opo tu kale twa ninga ombelewa mOshakati,” Andreas ta ti.
Okwa ti ovadali nava kwatafane keenomola davo 0814566879 ile 081754900 opo va shangife ounona veehamba ile elongo. “Ngeenge okaana kwa li ka shangifwa mehangano letu ndele taka xulifa, ehangano letu otali ka yandje omakwafo okulongifa peenghali kovadali vokaana oko,” Andreas ta ti. Okwa ti ota indile ovanangeshefa, nomahangano ile ovaleli vopapolitika opo va kale tava yambidida oshikefa shavo shoshimaliwa, opo va kale ve na oshimaliwa sha wana shokulongifa mokuyambidida ovadali ve li momhumbwe.
Andreas okwa weda po ta ti oshiwana osha manguluka okudenga efimbo keshe ngeenge shi na omapulo kombinga yehangano lavo. “Ounona veehamba omayambeko okudja kuKalunga, onghee ohandi kunghilile ovadali opo va kale tava file oshisho ounona, ndele hakukala omudali ta longele okaana ominyonena shaashi e na oluhepo,” Andreas ta ti.