ONGWEDIVA - Penda Awene omunamido 35, omukalimo womoshitukulwa shaShana nokwa hokololela oshifokundaneki eshi nghee ta velwa keenghalamwenyo dovanyasha di li monghalo i limbililika.
Awene okwa tumbula kutya okutala ovanyasha vahapu va ninga oihakanwa yomalodu nomapangwe, vamwe kave na oilonga voo vamwe va ninga oilyo yaava hava kala va kalela onhopa yaKandjengedi mOshakati ohashi kala shi mu uditife nai.
Okwa yelifa kutya okwa tota po ehangano loFaith and Hope Youth Employment Club li na sha nokuvatela ovanyasha momikalo da yooloka, omo ta pula yoo epangelo opamwe novanangeshefa va dule okukufa ombinga opo va yandje oshimaliwa shokutameka.
Awene okwa popya yoo kutya elalakano lehangano laye okuhanganifa ovakwashiwana peenhele da yooloka moNambia opo va tameke okutula omadilaadilo kumwe nghee ve na oku shi enda opo va dule okueta po eemhito doilonga moshilongo.
“Ovanhu haaveshe va ya fiyo okoiputidilo yopombada, onghee otwa hala ovanhu veengudu adishe va dule okuvatelwa. Eemhito doilonga edi nda diladila okuyandja koshi yopologalama ei ongaashi epangelo li tameke okuyandja eetendela, kutya okuwapaleka moipangelo oshoyo meenhele da yooloka, okulonga omalusheno osho yo eetendela domaludi a yooloka di kale hadi yandjwa kovanyasha ava opo va dule okulimonenapo okafilinga,” Awene ta ti.
Okwa tumbula yoo kutya moshilongo omu na ovanhu vahapu ve na oitalendi ya yooloka tava dulu okumona oilonga okudilila meliko lopaushitwe ashike ova pumbwa epitiko okudilila keeministeli donhumba opo va dule okuya komesho. “Omukalo watya ngaha ondi wete otau ka vatela Ovanamibia vahapu ngeenge tashi ya pokudenga oluhepo nondjala momaumbo. Natango eshi otashi vatele yoo okushunifa oimbuluma moshilonga pedu, shaashi ovanhu vahapu ova ninga ashike oihakanwa yokulonga oimbuluma molwoluhepo,” Awene ta ti.
Awene okwa tumbula yoo kutya yee naye ke na oilonga, oha kendabala ashike okutula omadilaadilo aye kumwe, ndele te yapo naashi tashi dulu oku mu vatela, ngaashi okulandifa oingumutulu yaye ya dja moshikunino e shi ninga mwene peumbo.