Aakalimo yomonooli oya taalela uupyakadhi wiimuna yawo tayi yakwa kiiguda nenge nomomakuti.
Aakalimo yomiitopolwa ya yolooka yokoonoli otaya nyenyeta kutya iimuna yawo onkene tayi yakwa po.
Taya ti, unene ohayi yakwa po kaaniilonga mboka ya kutwa onga aasita yiimuna.
Omupehakuluntu gwopolisi koshitukulwa shaMusati, Moses Simaho okwa ti, oshiningwanima oshitalala, oshomulumentu gwomimvo dhopokati a yi konima yekumba sho a adhika niimuna kaayi shi ye.
Simaho okwa ti, omulumentu ngoka okwa li a yi niimuna yaantu kaashi li papitikilo lyamwene gwiimuna mehuulilo shiwike.
Okwa li aadhika niikombo yili ine, oshowo oonzi ndatu. Moshiningwanima shimwe, omulumentu gwomimvo 30 okwa mangwa po sho kwa li a yaka oshikombo noku shi dhipaga.
Simaho okwa ti, oshiningwanima shoka osha holoka momukunda Oshivanda ShaNghatanga.
Omulumentu ngoka anuwa okwa li i iyakele koshigunda shaantu e ta yaka ko oshikombo shoka shi na ongushu N$2 500.
Sem Shipanga ngoka e li omukalimo moshitopolwa shaMusati okwa ti, oyendji yomuyo oya kutu Aaangola ihe kaye ya shi nawa, naampoka ya za kaye shi po.
Ngele ye ya momindhingiloko dhawo e taya tseya mo nawa, ohaya ka yaka po iimuna yawo.
“Otatu kanitha iimuna noonkondo, ngele oya pitithwa moAngola ihatu yi mono we, ihe ondi wete kutya uupyakadhi oongamba ndhoka dha weya pokati kaAngola naNamibia,” ta ti ngaaka.
Shipanga ta ti sho ya kala nale omimvo dha piti, oongombe nando odha ningi ethimbo dha kana, ohadhi ka monika oshoka omo dhili moshilongo, ihe nena ngele odha kana, ihadhi ka monika we, oshoka moshilongo odha hingwa mo.