Ompumbwe yomayakulo guundjugo oga kateka epatululo lyosikola ompe ya kotha oomiliona N$23 molukanda lwaSauyemwa moRundu. 
Shi ikwatelela kuuyelele womukuluntu gwelongo moshitopolwa shaKavango East Fanuel Kapapero, osikola opo ya tungwa yedhina Markus Sitongeni Ihamba Primary School otashi vulika ashike yi ka patulule omiyelo dhawo muFebuluali.

Omukuluntu gwelongo okwa ti oopaipi dhuundjugo wosikola inadhi kwatakanithwa natango naandhoka dhondoolopa. “Otayi vulu ashike okupatuluka muFebuluali uuna eshongo ndyoka lya kandulwa po. Onda li nda ka popya namaningela komatungilo nokwa ti ope na wo uupyakadhi wokutula mo omalusheno, ashike okwa ti mboka otawu kandulwa po ethimbo kehe. 

Ta ti uupyakadhi uunene ekungulukilo lyomeya gokuundjugo. Omukuluntu gwelongo okwa lombwele oshikundaneki oshimwayina naashika shoNew Era kutya aalongi oye li taya kutwa. 
Osikola ndjika ompe oya li ya tungwa opo yi kwathele omwaalu gwa pitilila gwaanasikola moSauyemwa Junior Primary School noSauyemwa Secondary School moka oyendji haya kala moongulu dha udha sha pitilila. Aalongi yamwe otaya ka tumwa wo kosikola ndjika okuza koosikola ndhoka mbali.

“Aalongwa mboka taya ka ya kosikola hoka otyaya ka kuthwa koosikola oonkwawo mbali,  Sauyemwa Junior Primary School noSauyemwa Combined School opo dhi pupalelwe, otatu popi osikola yin a aalongwa 800, okuza mondodndo yoshikunino sigo ontiheyali,” ta ti ngaaka.
Oosikola moRundu monakuziwa uuna dha udha sha pitilila odha kala nokudhika omatsali opo ya vule okutaamba aalongwa ayehe. New Era okwa li a lopota omumvo gwa zi ko kutya oosikola odhindji moRundu odhi na oongulu dha pitilila aalongwa, noongulu dhimwe oto adha mo aalongwa ye thike po80.