Festus Hamalwa
Ovaneumbo vamwe komukunda Ouhongo moshitukulwa shaHangwena ova ninga efiku tava dedaulwa koshilulu osho hashi popi tashi va pula opo ve shi fute oimaliwa.
Tava ti oimaliwa aishe kumwe oyo va pa oshilulu oN$1000. Ovaneumbo ava tava hokolola kutya ova ya kongeleka yoshiveva ok ova ilikanenwa noshilulu paife osha mwena, ashike nande ongaho, onghee ngaho ve na oumbada kutya pamwe otashi aluka.
Ovaneumbo ava va ti ova dengwa, nokutilwa omeva noshoyo okufufilwa omadu. Oixuna ei oya eta opo va tembuke mo meumbo lavo ndele tava kala ashike hava nangala momuti.
Pefimbo Kundana a talela po eumbo latatekulu Aser Haufiku oshivike sha dja ko, omukulukadi waye meekulu Hambeleleni Hamukwaya womido 80, okwa hokolola ta ti ovaninga efiku tava dengwa nomakende eebiila, oikutuni nonomamanya.
“Meumbo okwa li twa tembuka mo, okwa li ashike hatu nangala mepya koshi yomiti molwashi otwa loloka okudengwa,” ta hokolola.
Hamukwaya okwa ti ounona navo ohava dengwa ngeenge tava i kofikola efimbo longula omanga vamwe ohava fufilwa omadu. “Oshilulu osha denga yoo vali okatekulu kange keedula mbali noshikuni komutwe,” ta ti.
Omukulupe Haufiku, oo e na oulema womesho okwa hokolola ta ti okwa li e li moudjuu wokudengwa molwashi iha monoko. Okwa ti okwa kumwifa koshilulu hashi popi efimbo lomutenya nokudenga ovanhu omutenya.
“Ihandi dulu okufaduka po. Ohandi mono ashike eshi handi dengwa nale nomanghava neengonyo koshilulu,” Haufiku ta hokolola.
Haufiku okwa ti oshilulu oha shi kala tashi popi tava shi pula oimaliwa noikulya. “Oshilulu oshe tu longela omunyonena. Eenduda oda tatulwa omakende, omivelo oda tewa po, dengwa nomamanya,” ta hokolola.
Kornelius Haufiku weedula 52 okwa hokolola ta ti okwa monifwa oshiponga mokuulu, a dengwa koshikuni shomundilo.
“Onda hangika ndi li kepata, oshilulu osha pula nge kutya oshike inatu hala okushipa oimaliwa. Okudja opo osha denga nge kokuulu ndele handi li denge po,” ta ti.
Okwa ti ova lombwelwa koshilulu opo va tule oimaliwa N$800 koshuunda shaashi vati ove na eendjo doshilulu. “Okudja opo otwa tula oshimaliwa N$800. Efiku la landula ko natango oshilulu osha twikila nokutupula oshimaliwa tashi ti kutya oimaliwa ei twa yandja ina i wana,” ta hokolola.
Haufiku okwa hokolola ta ti ova weda po N$200 oyo va pulwa koshilulu.Okudja opo ova tokola oku ya kongeleka yoshiveva oko vaka ilikanenwa ndele tava pewa ko omaadi nomongwa opo va vaeke noku uunda meumbo. “Konima eshi twa tula omongwa nomadi meumbo oshilulu osha mwena. Otwa lombwelwa kongeleka kutya omulumenhu Omuangola ha lifa oimuna meumbo letu oye kwa li a shituka oshilulu,” ta hokolola.
Okwa ti okudja opo omulumenhu ou ove mu tataa nokudja opo ova shuna meumbo lavo noshilulu ihava ve shimono vali tuu nande. “Ashike nande ongaho ihatu kofa vali twa manguluka molwashi natango otu na oumbada kutya oshilulu pamwe otashi a luka,” tati.