Kansela woshikandjohoololo shaNdobe Helaria Ndjuluwa pamwe nevava longudu yoSwapo lovakainhu, ehangano loProject Hope ova yambidida omaumbo avali ovakulupe konima eshi a pya po komundilo.
Ovakalupe ova pewa omakwafo ngaashi eelata doilya dili 60, omo keshe omukulupe a pewa eelata dili 30, oikumbafa, oikutu, omatalashe neembete mbali keshe keumbo.
Ovakulupe ava vavali ova pilwa omaumbo avo momwedi Aguste, omo ta kuhokololwa kutya omaumbo avo okwa nyanauka po filufilu komundilo eshi mwa pila oinima yavo aishe.
Eumbo eli la pya tete olomukulupe Helaria Vanyana momukunda Okauva, moshikandjohoololo shaNdobe.
Ota ku hokololwa vati omukulupe ou okwa li tanu ombiya yaye yomakaya eli mondjuwo yokunangala, nokonima ombiya yomakaya oya dja omakala ndele fiyo taai koikutu ei kwali i li pedu mondjuwo.
Okudja opo onduda oya tema fiyo omundilo tau i keenduda dikwao domeumbo.
Omafiku 08 Anguste, natango moshikandjohoololo shaNdobe omwa lopotwa eumbo la nyanaunwa po komundilo lomukulupe Albertina Shaamena weedula (82).
Eumbo vati ola laxwikwa po kokatekulu kaye eshi kwali ta ka danene okapalwa.
Pefimbo ta yandje omakwafo kovakulupe kansela Ndjuluwa okwa popya ta ti konima eshi ombelewa yaye ya lopotelwa omaumbo ovakulupe a pya po okwa kala nokukonga omakwafo moshiwana opo shi yambidide ovakulupe.
“Konima eshi nda ka konga omakwafo moshiwana, ombelewa yange oya pewa eelata doilya dili 60 kevava longudu yoSwapo lovakainhu, omanga ehangano Project Hope ola yandje eembete mbali, nomatalashe avali, nonduda yoshipekeleki ei ya pewa ovakulupe,” Ndjuluwa ta ti.
Ndjuluwa okwa ti ovakalimo vomoshikandjohoololo shaye na vo ova yambidida ovakulupe eshi va yandja oikutu kovakulupe ava va pilwa omaumbo avo.
Kansela okwa ti mopaife ngaha okwa yambidida ovanhu veli 150 ava kwa li veli momhumbwe yoikulya vomoshikandjohoololo shaye, va pewa omakwafo oikulya noikutu okudilila mombelewa yaye.
“Ombelewa yange otai lalakanene oku yandja omayakulo koshiwana, nokukwashipeleka kutya kapena omunhu ta kala ena omhumbwe yoikulya. Onghee hano oshiwana na shi kale tashi kwatafana nombelewa yopashikandjohoololo ngeenge shi li moupyakadi,” Ndjuluwa ta ti.
Ndjuluwa okwa ti okwa pandula unene oshiwana eshi sha yambidida ovakulupe konima eshi va pilwa omaumbo avo, onghee okwa ti oshiwana na shi twikile nokukala tashi yambidida ovanhu veli moupyakadi.