New Era Newspaper

New Era Epaper
Icon Collap
...
Home / Va yandja omashina oku fudifa koshipangelo mOtavi

Va yandja omashina oku fudifa koshipangelo mOtavi

2021-07-19  Festus Hamalwa

Va yandja omashina oku fudifa koshipangelo mOtavi
Top of a Page

Ongeshefa yohorongo cement pamwe noshiwana shomomudingonoko waTavi ova yandja oikwafifo yomashina oku fudifa ovanhu ava vakwatwa oCovid-19 kendiki louhaku lili mOtavi. 

Moshipopiwa shaye omukunhuwiliki woushipangelo Gehardo Timotheus kefiku leyandjo lomashina oku fudifa okwa popya ta ti okwa pandula unene eshi oshiwana mOtavi pamwe nongeshefa yOhorongo Cement va shakeneka epangelo ondjilakati nokukwashipaleka kutya oshiwana oshina oikwafifo yoCovid-19.

Timotheus okwa ti okwa didilikwa oipangelo yomoshitukulwa shaye ili momhumbwe yoikwafifo yoCovid-19 onghee okwa ti omashina oo a pewa endiki louhaku otaa ka kwafela oshiwana neenghono nokukwashipaleka kutya eemwenyo dovanhu oda xupifwa.  

“Ohorongo Cement pamwe noshiwana shomomudingonoko waTavi oya kufa etokolo lomondjila eshi ya yambidida oshikondo shouhaku mOtjozondjupa. Onghee osho shili kutya oCovid-19 omukifi owa nyika oshiponga neenghono, omo moshitukulwa shetu mwa didilikwa muna omafyo eli pombada nai, shaashi ovanhu vamwe ova fya molwaashi kapena sha omashina oku fudifa a wana,” Timotheus ta ti.

Ohorongo Cement oya yandja omashina oku fudifa eli atano, omanga oshiwana sha ongela oshimaliwa ndele ta shi lande omashina avali. Timotheus okwa indila kovanangeshefa oshoyo ovaleli vopapolitika opo va yambidide oshikondo shouhaku osho natango sha pumbwa oikwafifo ihapu ngaashi eembete, oulapi vokomilungu, omashina oku fudifa nosho tuu.

Okwa kunghulila oshiwana opo shi twikile noku li ufa komilandu doCovid-19.


2021-07-19  Festus Hamalwa

Share on social media
Bottom of a page