Festus Hamalwa
Ehangano lovanafikola tave lihongo koipupudilo yopombada loNANSO ola ninga oshikonga Etine mOngwediva shili ominge nounona vofikola hava kutwa moilonga vena eedula inadi fika.
Elalakano loshikonga okuxwaxwameka ovadali, ovatekuli novanangeshefa va yooloka vokonooli opo va xulife po okuyandja oilonga kounona veli mofikola.
Oitukulwa yokonooli oyo imwe ya didilikwa ina omwaalu muhapu wounona hava fiye po ofikola eshi va kutwa moilonga kovadali vavo konangeshefa va yooloka.
Moshipopiwa shaye omukulunhuwiliki woNanso koshitopolwa shokonooli Malcolm Kambanzera okwa okwa ti Nanso okwa kala nokuninga omapekapeko koitukulwa yokonooli kombinga younona tava kutwa moilonga va shona.
Okwa ti ounona 200 yandja moitukulwa Omusati, Ohangwena, Oshana nOshikoto veli peedula heyali fiyo 15 ova fiya po eefikola eshi va kutwa moilonga ngaashi okulandifa meendingosho, okulandifa momatala nokulonga meefitola nosho tuu penhele dihapu domangeshefelo.
Kambanzera okwa ti ka shili mondjila kovadali okukala tava longifa ounona vo fikola meendingosho domalodu shaashi eshi otashi piyaneke elihongo lokaana nokukala sha yandja ohokwe kokaana ka kale ta kanu omalodu noingangamwifi.
“Ovadali na va fimaneke oufemba wounona vavo, ova vadali nava kale tava tuu ounona vavo omukumo opo va kale vena ohokwe yokukala tava i keefikola shaashi ehongo ola fimana kokaana keshe,” Kambanzera ta ti.
Komutumba woshikonga okwa li kuna ovanafikola va dja koipupudilo ya yooloka monooli, novadali veu ya okupewa ouyelele nehongo kombinga nghee sha nyika oshiponga okukuta ounona veedula di shona.
Nanso okwa ti ota twikile nokukala ta ningi omapekapeko moitukulwa yokonooli opo ovadali ile ovanangeshefa tava ka hangika vakuta ounona vofikola veedula dishona vaka tukilwe onghatu yopaveta.