Omupopiliko wopolifi moshitukulwa shaShikoto Inspector Ellen Nehale okwa kunghulila oshiwana opo shi xulife po okukala tashi fiile ovalumenhu ounona voukadona, ovakulupe noilema momaumbo shaashi okwa didilikwa va ninga oihakanwa yokutwa onghonga.
Nehale okwa ti ovakainhu nounona, ovakulupe ka veli vali meameno omanga vamwe ova kala ve na oumbada wokulongelwa oushada wopaixulo.
Okwa hokolola ta ti omudo wadja ko moshitukulwa shaShikoto omwa lopotwa oimbofa 15 yomakwatonghonga, omo mwa kwa telwa ounona, ovakulupe vovakainhu.
Nehale okwa ti opolifi ohai lopotelwa oimbofa ihapu yomakwatonghonga younona novakainhu eshi va kwatwa onghonga kovapata vavo ngeenge wa fiwa navo momaumbo.
Meenghundafana a ninga naKundana Omaandaxa Nehale okwa hokolola ta ti onghalo yovakulupe tava kwatwa onghonga oya limbilika unene oshiwana eshi ovakulupe ve na eedula okutameka 70 hava kala ashike va ninga oihakanwa yokukwata onghonga ngeenge tava di keendingosho.
“Oimbofa aishe twa lopotelwa yovakulupe va kwatwa keenghono, oya ningwa pefimbo ovakulupe tava di keendingosho eshi va ningilwa oilonga youshada moixwa kovafekelwa ve e shivike.
Okwa ti ngeenge omunhu a kwatwa onghonga eshi oha shi piyaneke omadilaadilo omunhu eshi vahapu hava kala tava hepekwa konghalo yopamadilaadilo. “Opolifi oye shipondola okukwata po ovafekelwa vamwe va kwata ovakainhu keenghono, ashike ovafekelwa vahapu ina va kwatwa po fiyo opapa shaashi ohava faduka po konima ngeenge va kwata ovanhu onghonga,” Nehale ta ti.
Okwa kunghulila oshiwana opo shi kale tashi lopotele opolifi diva ngeenge sha kwatwa onghonga ile ngeenge tashi ningilwa omatilifo opoixulo. “Natu longeni kumwe nopolifi opo tukondjife onghalo yomakwatonghonga i kale ya xulifwa po,” Nehale ta ti.