Omupeduwiliki wouministeli woukashikekookanhu nonghalonawa yokaana Martha Mbombo okwa ti ovadali nava xulife po okukala tava longifa nai oimaliwa yopeendjela younona. Mbombo okwa ti ombelewa yaye oya didilika oimaliwa ei hai pewa ounona veefiyee nounona voukwanaluhepo hai kala tai longifwa nai kovadali ngaashi okulanda oikolwifa.
Okwa kunghulila ovadali opo va kale tava longifa nawa oshimaliwa shopeendjela shounona okukala tava landele ounona oikulya, oidjalomwa noipumbiwa yofikola.
Edi Mbombo okwe di popya Etitano pefimbo kwa li ta popifa oshiwana komukunda Otunganga moshitukulwa shaHangwena mefiku loufemba womunhu lo10 Desemba.
Okwa kunghulila oshiwana opo shi li kaleke kokule nokulonga oilonga youshada ngaashi okuningila ovanhu omahepeko omomaumbo shaashi eshi otashi teya po ombili yomunhu ngeenge ta hepekwa.
Okwa ti omunhu keshe oku na oufemba wokukala e na ombili, okukala e li meameno nokuninga omatokolo.
“Natu xulifei po okulongifa oikolwifa ihapu shaashi ngeenge omunhu a kolwa oha kwatwa komhepo yokulongela ovanhu ominyonena momaumbo ile keendingosho,” Mbombo ta ti.
Okwa ti ovanhu na va xulife po okuya moixulo lounona vofikola shaashi eshi otashi piyaneke elihongo lounona okukala ina veli tula mo moilongwa yavo yofikola.
“Ovanafikola lika lekeni kokule yokuya moixulo novanhu shaashi momilele oha mu dulu okudja oinima ihapu ngaashi omikifi ile omateelelo eshi shili eshongo linene kovanafikola,” Mbombo ta ti. Okwa ti unene tuu elongifo nai loshimaliwa keendingosho nalo ohali dulu oku etela omunhu a kale e na oshinyenu ngeenge a mana po oimaliwa yaye ndele eshi tai keumbo oha kala e na omhepo yokudenga ovaneumbo.
Mbombo okwa ti ovakulunhu nava xulife po okukala tava longo oilonga yominyonena komesho younona vavo shaashi eshi otashi yandje oshiopaenenwa shiii kounona eshi tava kulu.
Ouministeli woukashike kookanhu otau lalakanene okukelela onghalo yomahepekafano moshilongo nokukaleka po eameno lounona shaashi okwa didilikwa ounona navo va ninga oihakanwa yokuhepekwa momaumbo paife. “Natu longeleni kumwe opo tu kondje omahepekafano momidingonoko detu, ovanhu na va kale tava lopotele opolifi ile eembelewa detu ngeenge tava ningilwa omahepeko oukashike kookanhu,” Mbombo ta ti.