Aafekelwa yane oya holoka mompangu yamagistrata moWindhoek Omaandaha gwoshiwike shika, sho ya lundilwa kutya oya yaka omayego goompinda geli 33. Oshiningwanima shoka sha longwa omumvo gwa ziko ashike mbaka opo ya mangwa ngashingeyi.

Omayego ngoka, oga hokololwa kutya oga yakwa po omumvo gwayi mu August, pethimbo lyetewo lyegumbo mondoolopa yaOutjo moshitopolwa shaOtjozondjupa  moka woo mwali mwa yakwa  iipambele yamwene gwe gumbo ndyoka.

Shiikololela kuuyelele wagandjwa komugandjimulombo mUuministeli wOmudhingoloko noshowo Omatalelopo Romeo Muyunda , egumbo ndyoka olya mwene gwokashana kedhina  Etosha Height Game Safari.

Muyunda okwa hokolola kutya, aalongi yiikulumuna yeli yane oyali taya fekelwa  yiiteele megumbo ndyoka  na ngashingeyi mboka ya kwatwa, mwa kwatelwa omulunga nenge omufuthi  gumwe ngoka ali kondje komboloha sho aniwa a li eli moshipotha shuulunga neteyo lyombaanga yomOtjiwarongo.
 Omugandjumulombo okwa hokolola kutya ngashingeyi mboka ya mangwa moWindhoek shinasha noshipotha shoka oyo nee, Petrus Iipinge, Pendapala Paulus Herman, Ludwig Ndinelago Nangolo na Fortunato Jose Queta.

“Yatatu yomaafekelwa mboka ayehe oyeli aakwashigwana yaNamibia omanga gumwe ali omukwashigwana gwAngona,” Muyunda a koleke ngaaka.

Okwali woo a tsikile ko kutya mokati koonkwatwa dhoka mbali odhali dhapewa dhiifutilemo modholongo omanga mbali dha kalekwa modholongo. 

Mboka yali ya pewa yiifutile mo oyo  Iipinge na herman na oyali ya pulwa ya fute oshimaliwa shit hike N$ 30 000 kehe gumwe.  Nangolo na Queta oya kalekwa modholongo sigo oshikando shawo oshitiyali moka taya ka holoka mompangu momasiku 04 ga June nuumvo.

Yamwe woo yomwaamboka ya holoka mompangu esiku olyo tuu ndyoka omukwashigwana gwaChina Yi Chen Yu, Absalom Fillemon , Nghiyelepo Edward, noshowo Paavo Ndawedwa Nepembe. 
Ayehe mboka yatatu oyeli aakwashigwana yaNamibia na oyeli kondje nomboloha yoshimaliwa shithike N$20 000. 

Yi okwali  iifutile mo noshimaliwa shithike N$100, 000. Mbaka oyali ya holoka moshipotha sheyako lyomayego goompinda shoka shali sha ningilwa kondoolopa yaMaruru momumvo 2017.
Oshipotha shawo ngashingeyi osha undulilwa komasiku 15 gaJuni nuumvo moka tashi ka pulakenwa yo yawape oku pewa omageelo gawo.