Charles Ndeumane
Aaniimuna oyendji nuumvo oya dhengwa pomutima koshikukuta molwomuloka gwonuumvo ngoka gwa li gwa nkundipala ashike oshikukuta shika osha etela aanyangadhali yamwe oompito dhokwiimonenea iiyemo.
Aakalimo yomiitopolwa ya yooloka, mbyoka ya mona omuloka gu li hwepo oya gongela iihampi yomwiidhi niihenguti momagumbo oshowo pooha dhoopate taya landitha kaaniimuna mboka taya piti po opo yi imonene iiyemo.
Omukalimo gwomOtavi Loto Tangeni Shindongo okwa popi pethimbo lyoonkundathana naKundana ta ti oshikukuta shonuumvo oshe mu etela ompito yokwiimonena iiyemo a paluthe aakwanezimo ye oshoka omwiidhi gwe otagu landwa nawa. “Aalandi oya tameke okweenda unene ngaa okuza momwedhi nguka gwa zi ko muJuni, nokuya koomwedhi dhokomeho opo nee ongeshefa tayi ende nawa lela, ashike aaniimuna yamwe oya tameke nale lela okulanda omwiidhi gwiimuna yawo sho ya mono kutya omuloka gwonuumvo kagu li nawa,” osho Shindongo a ti.
“Aaniimuna yomonooli oyo unene haya yambidhidha oongeshefa dhetu ashike oyendji otaya nyengwa kiiyenditho yokuya nayo ya tute omwiidhi, andola onda li ndi na osheenditho ndi fale iihampi yandje koondoolopa ngaashi Omuthiya nOndangwa popepi naaniimuna andola otandi ningi oshimaliwa shi li hwepo, andola otandi gwedha ko ngaa kashona kondando yoshihampi shi ninge N$100 oshoka ngashiingeyi oshi na ashike N$70,” osho Shindongo a tsikile.
Omunyangadhali gumwe gwomomukunda Onamenye moshitopolwa shaShikoto James Johannes naye ota kambadhala okwiimonena iiyemo mokulanditha iihenguti yoongombe. “Uuna twa mana okuteya ohatu ende nokugongela iihenguti opo tu landithe tu mone mo okashona ketu ashike nuumvo osha kukuta unene. Iilya yonuumvo kaya li ya kola onkene inatu mona mo iihenguti oyindji, ashike uuhampi uushona mboka twa mono mo owa hakanwa po nale kaaniimuna oshoka oye shi kutya osha uka koomwedhi dhokomeho otayi ningi ondilo oshoka aalandi ohaya kala oyendji,” osho Johannes a ti.
Omupopiliko mombelewa yomupilimaminista Ringo Mutambi okwa popi pethimbo a li ta yamukula omapulo ga pulwa okupitila komalungula kutya oshikukuta shonuumvo okwa tengenekwa tashi ka kotha epangelo oshimaliwa shi vule poobiliona N$1 mokuandjakaneka iikulya yoshikukuta.