Omuprimaminista Elijah Ngurare okwa ti, openzela yaakulupe oya li ya popiwa kOmupresidente kutya otayi gwedhelwa, naashika otashi tulwa miilonga omumvo tagu ya.

Ngurare okwa popi ngaaka esiku kwa li kwa dhimbulukwa esiku lyemanguluko kOkapya moshikandjohogololo shOndangwa mehuliloshiwike. “Shoka sha uvanekwa kutya oshikwiila shaakulupe otashi gwedhela – otashi ningwa, oshigwana nashi indhindhimikile epangelo sigo omumvo tagu ya,” ta ti ngaaka.

Ngurare esiku ndyoka okwa kwashilipaleke kutya ye opamwe naaleli aakwawo otaya kala enda oshilongo ashihe taya longo nuudhiginini opo ya gwanithe po shoka ya uvanekela oshigwana. Ta ti, shoka otaye shi ningi okugwanitha po omahalo noompumbwe dhaakwashigwana.

Ta gwedha po kutya oya gongala esiku ndyoka omolwesiku lyemanguluko ndyoka hali dhimbulukiwa omumvo kehe momasiku 21 gaMaalitsa.

“Esiku ndika hali ndhimbulukiwa nokutyapulwa omolwemanguluko lyoshilongo, ohali simanekwa omolwomapendafule ngoka ga hulitha sho taga kondjele oshilongo shi manguluke oshowo okutumbaleka mpoka oshilongo sha thikama nena,’’ ta popi ngaaka. Ngurare ta ti, Namibia nena okwa manguluka, e na ombili nota tsikile okuhuma komeho.

Ta ti, epangelo natango olye ya po netokolo kutya elongo kiiputudhilo yopombanda itali ka futwa, shoka tashi ka pa ompito aanona oyendji ya kale ya nyengwa okutsikila eyilongo lyawo omolwoshimaliwa. Omukulupe gwomimvo 83, Thoini Mathew gomOshakati okwa ti, otaya ka pandula sho taya ka talika kepangelo.

Ta ti, pamwe taya vulu okuyambindhindha aatekulu yawo osho wo okugwanitha po oompumbwe dhawo.“Tse aakulupe otwa tentekwa uudhigu waatekulu, aavali yawo nayo oye tu kalela momagumbo, ihe nayo oya tala ashike moshikwiila shetu shoka hatu mono,” ta nyenyeta ngaaka.

Ta ti, aanona yawo yamwe inaya mona iilonga, omanga yamwe oosikola inaya mana.

-vkaapanda@nepc.com.na