Eshi kwa lopotwa ovanhu vanhe va fya eshi va kwatwa koluvadi mexuliloshivike, omunambelewawiliki koshikondo shetengeneko longhalo yomhepo Odillo Kgobetsi okwa kunghulila oshiwana opo shi kale sha ngungumana shi li meenduda ngeenge ku na odula i na oushelu nomingungumo shaashi eshi osha nyika oshiponga.
Okwa ti oshiwana nashi xulife po kukala tashi longo momapya ile okukala tashi tu oilya koshini pefimbo lodula tai shela shaashi eshi ohashi dulu oku eta oshiponga ile efyo.
Eshi a ninga eenghundafana naKundana Omaandaxa Kgobetsi okwa hokolola ta ti okashelu oka nyika oshiponga neenghono shaashi kake hole ovanhu tava endaenda pefimbo lodula tai loko onghee oshiwana nashi kale tashi landula omalombwelo aa a tulwa po kovanambelewa vokulonga nonghalo yomhepo.
Okwa ti ovakulunhu nava kale tava yandje ouyelele kounona opo va xulife po okukala tava danauka ile tava ningi eweelelo ngeenge ku na odula tai shela.
“Ovalifi voimuna ngaashi oikombo nava xulife po okukala tava ka yaama odula koshi yomiti shaashi okashelu kake hole omunhu e li koshi yomuti,” Kgobetsi ta ti.
Okwa weda po ta ti oshiwana inashi pumbwa okukala shi li mumwe noinamwenyo ngaashi eembwa, oumbishi ile oikombo ngeenge ku na odula tai shela shaashi eshi ohashi eta noupu okashelu ka kale ka kwata ovanhu.
“Oshivike eshi otwa taalela odula ihapu i na omaluvadi nomingungumo koitukulwa yokonooli osho yoo oshitukulwa Erongo noKunene,” Kgobetsi ta ti.
Okwa kunghilila yoo vali oshiwana opo shi kale sha kotokela omeva momidingonoko davo nokukala sha tonatela ounona pefimbo eli lodula i li metifa shaashi okwa didilikwa ounona va ninga oihakanwa yokufila momeva.