Otjiṱiro Otjindjandja irimwe romapu ngu maye hepa ombango yapeke yohoromende ya Namibia.

Ombuke nomukonḓonone motjitamba tjoporotika ponganda yomahongero wokombanda ya Namibia, ousupi Ounam, Rui Tyitende, ma tja. Mehungi re korukuiko indwi Oafrika Maruhungire nda pitire momurari imbwi omupaturuke kotungovi Outube. 

Eye ma zirire komapuriro ongondoroka noviṋenge pekepeke nokutja tjii hapo ohoromende ombe ya Namibia kehi yOperesindenda ombe Netumbo Nandi-Ndaitwah, oviṋenge pekepeke imbi mai ṱunu nokuvihonina vi? Muvyo mu mu nOtjiṱiro Otjindjandja Tyitende tji ma munu kutja itjimwe tjoviṋenge ovihungame otjomatokero nga kuramene ohoromende ya NNN. Nu tji mai sokuzengurura kutja ozondekurona zOvaherero nOvakwena nOvaṱakume ve heruke komireko nai kuveri mena rohoromende ya Namibia noyEhi rOvandoitji aze hi ya zengurura epu rOtjiṱiro Otjindjandja tji tja zepaisa omihoko imbi omingi. 

Ma tja ohepero tjinene ohoromende mokuzengurura epu indi itjiwe kokutja epu nda ṱuna komihoko viṋe mbya ihamisiwa nu mu nao momazengururiro waro mbya sere okuzemburukwa i yohoromende. 

Tjingetjo otjeri ohepero omihoko noviwaṋa imbi okuwana nokuhungira eraka rimwe. Tjinga nai avya haṋika. Tjeri otjiṋa tji tji ha yandja oupupu komazengururiro wepu ndi. Ozondekurona okutuurungira mOngutiro yo 2006 yOmbongarero yOtjiwaṋa ndja za mombepo tjingetjo mondjuwo indji yOmbara yOvaherero omuyaruke Kuaima Riruako, ohoromende i vatere ozondekurona okuhungira kunEhi rOvandoitji naṋi mave twara kumwe nohoromende yOvandoitji harukuru ii tavere koviṱukaviungura vyoruveze rohuurire mbya twara kOtjiṱiro Otjindandja. 

Tjazumba i ningire ondjesiro nu harukuru i tare kokutja tjii hapo ozondekurona inḓa mai zehuhumiṋa vi. Ouhumandu ngamba otjihungiriro tji tja karapo opo kati kozohoromende mbari oya Namibia noyEhi rOvandoitji oyo ndja panḓa okuhungira omurungu nomurungu ku nozondekurona. 

Mo 2021 mutjo amuzu kundino ndji tjiukwa otjOnḓuvasaneno yApamue, Ojoint Declaration, osupui OJD. Oyo nai ndja kuramene okutuwa komunwe kembo posi ya ozondekurona tjiva nḓu za yara.

Nai momeyero we kotjihavero NNN wa zuvakere mozonganda zozombuze zomauye wopendje tjimuna OBBC ya Britain, ama kuzu wa twa ombaze pehi kutja otjihungiriro ngatji yarukirwe. 

Na maku zu wina ma raisa kutja Ehi rOvandoitji mari sokuningira ondjesiro. Na wina ama tja Ozondora za Namibia omatau o-18 kehi yonḓuvasaneno ya Pamue otjiṱiṱi. Ozondekuroan tjiva nḓu maze munu kutja nambano ma imbura eimburiro rarwe rondumbukiro. Nandarire kutja Okambineta mari yOmuheṋendu Mbumba, mu Tjitarazu ombura ndja zu ko yayakurire OJD.