“Otwa hala okumana eifani eli twa tameke nalo, ina tu hala okulihongela eifano loPopulation Study shaashi olina odjapo yonghatu yopedu okufafanifa nodjapo ei a tuli hongele meifano loPublic Health.”
Aa omatumbulo ovanafikola vomoshipupudilo shaUnama mOshakati tava hokolola Etine pefimbo va ninga omunyanyo wopambili komesho yoshipupudilo shavo.
Ovanafikola tave li hongele eifa loPublic Health ova udifwa nai konima eshi va shivifilwa kUnam kutya ocourse eli tave li hongele otai kufwa po, opo Unam a tule po eifano lipe loPopulation study. Ovanafikola ove li momudo waxuninwa wokulihongela eifano lavo, onghee ova ti kutya ina hala okushuna monima opo veke lihongele eifano eli lipe la tulwa po.
Shikongo Eliphas, oumwe womovanafikola veli momudo waxuninwa, yee okuli yoo vali omuwiliki wa vakwao koshikondo sheifano lavo nokwa lombwela Kundana ta ti Unam okwe ninga epuko la kula eshi a shivifila ovanafikola kwa lata kutya ova pumbwa okushuna monima opo veli keli hongele eifano lipe.
“Otwa lombwela ashike neudo kutya ita tu twikile nodula yetu yaxuninwa meifano eli kwa li tweli pyakidila nalo. Onghee vati otuna okukaninga oilongwa yoPopulation study opo tu dule nawa okumana eifano olo,” Eliphas ta hokolola.
Okwa ti eifano eli la tulwa po kali na eemhito doilonga okufafanifa neifa eli tave li hongele onghee itave shi pitike opo veke li hongele eifano lipe.
Namene Isak naye omunafikola eli momudo waxuninwa, okwa ti Unam ne va efa opo va mone neifano lavo eli va tameka nalo shaashi ngeenge ovanafikola ova i keifano lipe eshi otashi ka eta ovanafikola vamwe va kale va dopa oilongwa ei tai ka longwa keifa lipe.
“Oshili oufemba wetu vene okukala twa holola eifano eli twa hala okuli hongela, Unam ke na oufemba wokokuninga omatokolo kombinga yeifano eli tuna okulihongela,” Isak ta ti.
Okwa weda po ta ti ovadali vavo ita ka kala vahafa eshi ounona vavo tava shuna monima keifano limwe vali lipe.
“Ngeenge omunafikola teli hongele eifano ine li panda eshi oshi eta omunafikola opo a dope shaashi omwenyo waye inau panda kwa shi teli hongele. Onghee ohatu indile elelowiliki laUNAM opo li kale la kadula po oshikumungu eshi diva shaashi fye ina tu panda,” Isak ta ti.
Ovanafikola ova yandja omukanda nyenyeto wavo komukulunhuwiliki woshipupudilo shaUNAM konooli Dr Jacob Sheehama.
Sheehama okwa u danekela ovanafikola kutya omukunda wavo oteu fikifa kelelowiliki lakula laUNAM koWindhoek.
Okwa ti ngeenge okwa mono enyamukulo kombinga yenyenyeto lovanafikola ota ka yandje diva enyamukulo kovanafikola kombinga ya shi tashi ka nyamukulwa okudja kelelowiliki.
“Kaleni mwangungumana manga fimbo twa telela enyamukulo leni,” Sheehama ta ti. – fhamalwa@nepc.com.na