Auleria Wakudumo
Ove li fanekela peehauto dondilo, momaumbo mawa, tava li oikulya iwa keshe fiku noku tula omafano komalungula opo va kwate ko ovanhu.
Edi oda popiwa komunambelewa woipambele yoshiwana mOhangwena, Warrant Andrew Nghiyolwa pefimbo ta yandje ehokololo omo omupangi wokoshitukulwa shaShikota aka nyekwelwa omaliko aye kEndola “kukaume” kaye oo a shivila komalungula.
Nonande opolifi oya kala okukunghilila nokulondwela oshiwana shi kotokele eembudi unene komalungula, oku hena konasha kwoshiwana ota ku i oilongo yopolifi ihapu moshipala.
Otaku hokololwa omupangi weedula 27, oo ha di kOmuthiya a panga oukaume nomulumenhu e mu shakeneka koFacebook ndele tava ningi omangela opo va shakene kEndola. Omupangi ina ninga vati nande onghendabala yokuninga ekwatafano lopa vidio ile limwe vali manga ine li denga ondjila yokEndola.
Ota ku hokololwa kutya omupangi okwa fika mEndola pomulongo woufiku lwaapo (22h00). Okwa shakenekwa nokuya novamati vavali ovo vati ookaume kafelende waye wokomalungula.
Nghiyolwa okwa ti ovamati ova enda ashike vati oshinano fiyo omoluxwa. Ova kufa mo eembele, nokumbadapaleka omupangi tava pula oimaliwa. Konima ova fininika omupangi a dengele ovakwanedimo vaye opo ve mu kwafele va tume oshimaliwa.
“Oshimaliwa shotete shatumwa osha li N$1 000, novamati ova anya omupangi aye shaashi vati oshimaliwa osha li shi shona. Ove mu efa ashike eshi va tuminwa natango oshimaliwa N$2 000, ndele tave mu kufa ongodi yaye oyo i na ongushu yeedola N$14 000,” ta ti.
Oshiwana unene ovakainhu ota va kunghililwa va kotokele eefelende odo hava shakeneke komalungula opo va ha ninge oshihakanwa sheengangala dokomalungula.
Eshi ota shi shikula vali oshiningwanima sha li sha ningilwe mo 15 Octoba 2021, sha ningilwa omukadona weedula 19 oo a li a kwatwa keenghono komulumenhu weedula 28 va shakena naye natango komalungula nova kala veli mekwatafano oule womwedi. Omulumenhu “Exit, omaipupulu”.
Nghiyolwa okwa kunghilila oshiwana shi kale tashi tula eameno lasho komesho. Okwa ti “ookalyamupombo ova ninga vahapu, nota va longifa omikalo da yooloka oku kengelela oshiwana. Vamwe nokuli oto hange tava dengele ovanhu tava ti ovo omupolifi, omunambelewa Nghiyolwa, sha longo ondaka yange i shiivike kovanhu vahapu,” ta ti.
“Omapandja opaungoba o ena ouwa oshoyo owii. Ngeenge omunhu to shakene nafelende woye, shi ninge ni ponhele pena ovanhu, omutenya. Ovanhu vamwe ovo ovafimanekwa, ovakengeli, vena ouwa womoipala, va mona ehongo lopombada nosho tuu, ve li fanekela peehauto dondilo, omaumbo mawa notava li oikulya iwa keshe fiku komalungula opo va kwate ko ovanhu,” ta ti.