Ouministeli wounamapya, omeva nomatululilo omadu onghee otau twikile nokulongela ovanafaalama omauwa eshi wa ninga omutumba wokuyandja omaudeulo nounongo kovanafaalama vomoshitukulwa shaMusati Etivali.
Ouministeli wounamapya okwa li wa shakeneka novanafaalama va yooloka opo u yandje ouyelele kombinga yoprongalama opo ya totwa moministeli ya nuninwa okuyambidida ovanafaalama va shona novanafaalama va kula koitukulwa yokonooli.
Oprongalama oya totwa po nelelalakano okushakeneka ovanafaalama ondjilakati, nokuyambula po oshikondo shounamapya moshilongo.
Oprongalama ei oya kwashipalekwa noshimaliwa shoN$284,079, 245 kongongahangano yoEuropean Union melongelokumwe nouministeli wounamapya opo kuyambididwe ovanafaalama.
Moshipopiwa shaye ngoloneya woshitukulwa shaMusati Erginus Endjala okwa ti okwa pandula ouministeli wounamapya nehangano loEuropean Union eshi va tota po eprongalama tai ka eta enduloko movanafaalama nokukaleka po ounafaalama voimuna moshitukulwa shaMusati.
Endjala okwa ti ovanafaalama vahapu ova kala va talele omashongo ngaashi omukifi wekondo nelaka, oimuna tai fi kenota, nomangeshefelo oimuna taa ende kashona kovanafaalama vokomikunda.
Ngoloneya okwa ti oprongalama ei oya fimana shaashi otai ka kwafela ovanafaalama vahapu mokuhambula po oimuna yavo nokukaleka po omangeshefelo oimuna ta ende nawa.
Okwa kunghulila ovanafaalama opo va kale tava kufa ombinga momangeshefelo oimuna shaashi eshi otashi hambula po eliko loshilongo.
“Ohandi kunghulile omalelo opamufyululwakalo opo a kale ta yandje edu lokuninga oyuunda youlifilo ihapu opo kukelelwe engudumano loimuna ili mumwe,” Endjala ta ti.
Omukulunhuwiliki mouministeli wounamapya Percy Misika okwa ti ounamapya owa fimana shaashi otau hambula po eliko loshilongo nokukala la yandja oilonga kovanhu ngaashi okulonga keefaalama, nokomahangano okulandifa ombelela.
Okwa ti elalakano loprongalama ei okukwashipaleka kutya ovanafaalama vokonooli otave shi endifa nawa mounafaalama nokukandula po omashongo a talelwa kovanafaalama opo ovanafaalama va kale vaxwaxwamekwa okukala vena ohokwe younamapya.
“Ohatu lalakanene yoo vali okukondjifa omukifi wekondo nelaka tashi pitile moprongalama ei opo tu kaleke po oukolele woimuna yovanafaalama,” Misika ta ti.
Okwa ti oprongalama ei otai kakala tai yandje omakwafo oshali kovanafaalama aveshe veli momhumbwe nokuyandja ounongo kovanafaalama kombinga nghee ve na okukala tava landifa oimuna yavo ile nghee vene okukala tava pe oimuna omaludi oikulya yoitungifilutu.
Misika okwa kunghulila ovanafaalama opo longe nondjungu nokukala tava kaleke po oukolele nefilishisho loimuna efimbo keshe.