Osekundofikola Nuuyoma Secondary School okwa li ya unganeka oshivilo shomifyuululwakalo oshivike sha dja ko omo ovanafikola va dja keefikola 25 kwa li tava pewa ehongo kombinga yefimano lomifyuululwakalo.
Ovanafikola va dja koitukulwa ngaashi Oshana nOhangwena nosho yo Omusati okwa li va hangana nove udite ehafo okushakena novanafikola vakwao.
Osekundofikola Nuuyoma Secondary School oi li modoolopa yaShikuku moshitukulwa shaMusati.
Ovanafikola okwa li tava imbi nokudana oidano yopamufyuululwakalo omo kwa li tava ningi omafiyafano.
Osekundofikola Mwaala oye ya ponomola yotete okufindana moidano yopamifyuululwakalo.
Shituwa Secondary School okwe ya ponomala onhivali okufindana moidano yopamufyuululwakalo, ta ku landula ofikola Nuuyoma Secondary.
Elenga la kula tali wilike elelo laUkwambi, Chief Ndilimani Iipumbu okwa lombwela ovanafikola ta ti oivilo yoludi e li oya fimana kovanafikola opo ve lihonge kombinga yeenghulunghedi nomifyuululwakalo.
“Eefikola nadi twikile okuninga oivilo i li kombinga yomifyuululwakalo molweashi otashi yandje omhito kovanafikola opo va fimaneke ovahongifikola novakulunhu komaumbo,” ta ti.
Iipumbu okwa ti ngeenge omunafikola okuudite ko kombinga yomifyuululwakalo otashi mu kelele opo ha kwatwe komhepo yokulonga oimbuluma.
Okwa lombwela ovadali opo va kufe ombinga okukala tava longo ounona vavo kombinga yefimano lomifyuululwakalo.
Iipumbu ou e li natango omunashipundi womalelo opamifyuululwakalo monooli, okwa kumaida ovanafikola opo ve lihonge nelitulemo nokulalakanena okupita noidjemo iwa.
Okwa pandula ofikola Nuuyoma Secondary eshi ya unganeka oshivilo shomifyuululwakalo molwashi itashi ulike oshihopaenenwa shiwa.