Omukulunhu koshikondo sheedolongo Commissioner-General Raphael Tuhafeni Hamunyela okwa ti meedolongo daNamibia omu na ovanailongo ve li 455 ovo eepelesenda 97.3 ve li mo va pewa omahandukilo. 

Hamunyela okwa yelifa kutya ovatamanekwa ova longa oimbuluma ya yooloka ngaashi omadipao, eenghendabala dedipao, oumbudi wokuteya omaumbo, oumbudi woimuna nosho yo okudipaa oifitukuti ya amenwa. 

“Ovanhu vamwe ova kwatwa po shaashi kwa li tava kendabala okukwata po ounona novakainhu ombambyona omanga vamwe ova kengelela oshiwana oimaliwa yavo nokuhangika needjebo dakula vehe na omikanda,” ta ti. 

Hamunyela okwa ti ovanailongo ashike ve li 12 va teelela epangulo manga oibofa yavo i pwe tai ningilwa omakonakono, omanga ve li 443 va pewa nale omahandukilo. 

Okwa yelifa ta ti omunailongo oha tumwa koshilongo shavo ngeenge eedula daye dokukala modolongo da pwa ko. 

Okwa weda po ta ti kombinga ikwao ngeenge omunadolongo woludi olo okwa kala modolongo ndele eedula daye dokukala moNamibia tadi kushu ohapa ningwa omalongekido nombelewa yoikwameni opo a dule okukala a tuminwa koshilongo shavo. 

“Omunailongo ngeenge a longa oshimbuluma naye oha pewa ashike eedula dehandukilo ngaashi naana Omunamibia,” ta ti. -fhamalwa@nepc.com.na