ONGWEDIVA – Ovanangeshefa va yooloka moshitukulwa shanooli ove li tava yambidida eefikola noikwafifohongo, osho yo oikulya momikunda da yooloka nelalakano lokukwafa okanona Okanamibia mokuya komesho. Moshiningwanima shitalala omunangeshefa wedina Leake Hangala okwa yandja omakutu oufila e li o 50 kofikola yefina Edundja Secondary. 

Omukulunhufikola wopEdundja Secondary Shakwenonghwe Filipus okwa ti Hangala eshi opo e va kwafe noufila, omolwondjala oyo ye lihanena ofikola, unene ounona ava ve li momuhandjo. 

“Okwa li twa kwatwa kediladilo liwa lokweeta po oshinima eshi shaashi ovanafikola vahapu ohava ende oinano ile ngeenge tave ya kofikola, nosha kala hashii elihongo lavo moshipala,” ta ti. 

Okwa ti eshi nee va eta po omuhandjo, oikulya ei hai liwa kovanafikola ohai di ashike meendjato dovadali, ashike otava li tava pi. 

“Efimbo lihapu ohatu lihaluka ashike hatu tumu ounona komaumbo mokati komwedi shaashi oikulya oya pwa po,” ta ti. 

Ota ti ngeno okwa li epangelo tali va kwafa opo li va tete ondjilakati, li kale hali yandje nande oikulya kounona andp otashi kwafa neenghono. 

Omwedi wa dja ko natango ofikola yedina Onanghulo Combined oya lila oluhepo moshiwana, omo va li tava kongo ekwafo loshimaliwa shi na sha nemanifo lomuhandjo wavo. 

Konima ashike yomafiku manini, ovanangeshefa momudingonoko natango ngaashi Ondangwa Town Lodge, Kabucha Empire nUukalinawa Pharmacy ova waimina meyandjo loshimaliwa kofikola oyo, neemhumbwe dihapu ngeenge haadishe oda dulwa oku wanifwa po. 

-taimihaihambo2000@gmail.com