I Kae Matundu-Tjiparuro OTJOMUISE Pena omaundjiro kutja mo mayandero wo tjiveke ihi poo tji matjiyende otjiposa tjOvambanderu tjandje tjahara omuhunga. Nai ozohahende zominda aviyevari zekara notjiungura pokati kazo okurongerisa otjiposa ihi kutja tjiyaruke kOtjombanguriro tjOkombanda.Okanepo kemwe kokomiti onane yo vanamutjemo, Ngunaihe Tjitunga, waraisire nao ko New Era Oritjavari kombunda yombongarero yokomiti Omandaha. Watjere nandarire kutja ngunda otjombanguriro katji yayandja omayuva ondjira komurungu iimwe uriri ya hungama otjombangruriro. Otja kuye Omandaha tjiyari 11 komweze imbwi ozohahende otjizasere okuyeta omarongerisiro wazo wotjiposa nguzekara nawo kotjikoro. Watja otja kuwo ovanamutjemo otjombanguriro matji tjayerwa iyOmbara yOvambanderu, Munjuku II Nguvauva uriri tjavanga okupanga omutjise mbwatambuka motjiwana na isanene ovanatje ve aveyevari pamwe. Tjitunga watja owo maveyenene okupuratena kOmbara ndoovazu indji ndjiri ondimwa yo u zeu wao, oveta yOvambanderu Ombara ndji yatuako omunwe kembo, yahenununwa nu oruuma tjirwazu no ku wa pehi arire tji vatara kutja ondjira ko murungu ma isana pi. Otja kuye notjimbumba iho tjarwe vahanika mokutja ovo ovanamutjemo vevanga kujta omirari mu mwa pitira oveta indji viyarukirwe ngunda ovakwao avevanga kutja vetare mourekoto woveta indji na mo uvi mbyu nandangarisiwa inayo. Imba otja ku Tjitunga opu vahanikira novakwao. Watja ndoovazu oveta indji ya henununwa okutja otjiposa kOtjombanguriro Tjokombanda wina tjakoka. Watja ozohahende zawo kutja zetune otutuu to ku yarurakisa otjiposa kOtjombanguriro tjOkombanda, zeve ningira o N$8,000 tji vasuta no kuhina o u zeu. Otjiposa tjitja yaruka kotjombanguriro mavesutu ozohahende N$30,000 yarwe. Tjitunga watja veri kovipato nu otukondua atuhe pupena ovanamutjemo tua tjivisiwa nu otji vehina ondira notjimariva. Nai vakuramene okukara no mawongero wotjimariva mo myano peke peke tjinga ovana zongari nongendo nawo nawina ovanamutjemo ave riyandjera oku ripunguha. Watja otukondua tua ka ryangerwa nu munao otji tuna ondjiviro kutja kuto maku undjirwa oma kee ripunguhiro. Watja komurungu wa nai otjiwana tjo vanamutjemo tjasuta o N$40,000 no kuhina o u zeu. Tjitunga wa handjaura kutja ongwaye ovanamutjemo tji ve hina va kayambera natja ozongungu otuveze otuyapuke notuhuze ku ku kaningirwa otjiwa no tjiyangapandjara kovati. Mena ro uyapuke wazo tjingetjo ozondangere otji ze kwa kutja ovandu tji mavei ingo verire ovakohoke mominyo no kuhina ombameno. “Mongaro muturi kuna ovakwetu matu kauta oku umbasana nozohanga,” watjere naweza ko kutja ovo kOkahandja ka kuvaire nokongo kwa kaumbwa omawe. Munao mokutira o maumbasaneno womambo ovanamutjemo otji vemuna kutja maverihumbu nganduu tjipeya oupore ovandu tji va utu oku zuvasana. Watjere omuhoko una otjiposa mo tjombanguriro rukuru otjeri nawa owo okuritjevera no kupenga omahungi warwe omasondoro. Ongondjero oseinina yokuyapura mu Suramazeva yari no Ministera yOkehi yOmananeno wOtukondua, Ozongomainde, Omakwizikiro wOmara nOmekurusiro wOkozombanda, Kazenambo Kazenambo, nu ngwari a i hakara novihape oviwa.