I Wezi Tjaronda
OTJOMUISE
Otjiuru tjOuveruke wOvinamwinyo, Onganga Frans Joubert, matja omatjayerero wo manyingayingiro wo vinamwinyo mo Eiseba ohoromende nguyatuapere maye karako nganduu ongaro youveruke wo vinamwinyo morukondua indo tjiyarire ongahuke.
Ohoromende yatjaerere omanyinganyingiro wovinamwinyo moresevate indji indu Omandaha ondarata pokati ka Namibia na Tjauana tjiyakonderwe.
Omaturiro wa Eiseba yeri mene ya Tjauana mu muatambuka omutjise wOtjikoti nOtjinyo. Ozombuze za Tjauana otjiveke tjitjazuko zaraisire kutja Orupa Rouveruke nOmatumbiro wOvinamwinyo rwehi indo rwari mongondjero yokutjurura omatambukiro warwe womutjise imbwi mouye wa Ngami ozongondononeno tji za raisire kutja muna omutjise imbwi. Joubert watja ovature va Namibia mbehina kutjiukwa vakondere ondarata yomukoka pokati komahi ayeevari inga navehiti mehi ra Tjauana koukambe. “Katuna kutjiwa kutja aa vepaha tjike poo aa vetanda okutjita tjike kutja okuyeva poo okuvaka ovinamwinyo,” matja.
Ovature va Tjauana otjina ihi vetjimwine nave tjivasisa kouhopare wa Namibia nokuzambo ovinamwinyo otji vya tjaererwe oku nyinganyinga.
Ozogondononeno mazetjitua nai okuteza kutja pakarere omanyinganyingiro wo vinamwinyo no kupaha kutja viripi, Joubert matja. Okukatuka oveta okuhita mehi pona pupehina omberoo yopo mukoka wo pokati komahi.
Oritjavari o Porise mOmaheke yatjere otjina ihi kaina ondjivisiro natjo.
Omuporise mo Tjovazandu kehi o Eiseba kwiiwa watjere nandarire kutja ovaporise veryanga mene yomukoka imbwi ovikando vivari momweze, kaveya yakura ondjivisiro ohunga nomakondero wondarata. Watjere hapo ovature mene yomukoka veraera ovaungure vouveruke wovinamwinyo kutja vekatune ondarata nu porumwe veomba okurapota koporise.