Ndoovazu oviwaṋa mbya ṱunwa vya ningire nao ohoromende yEhi rOvandoitji mai yenene okuvivatera nombatero ovyo mbi mavi munu kutja mavi hepa.
Indjo ondji ri imwe yozombangu nḓe ri mOnḓuvasaneno yApamwe, Ojoint Declaration, OJD, pokati kohoromende ya Namibia nOyehi rOvandoitji, okuza nokuṱunwa.
Oyo nai ndja kuramene okutuwa omunwe kembo i yomahi ayeevari nga i yOministera ya Namibia yOnḓarasaneno yOmahi nOmaunguriro waKumwe, Peya Mushelenga nOyovitjitwa Vyopendje yEhi, yEhi rOvandoitji, Annaleen Baerbeck.
Omueze mbwa zuko Oministera yOkehi yOvitjitua Vyomoukoto, Lucia Witbooi, otja tjivisire kutja Okambineta ya yakurire OJD ndje ya mo 2021 kombunda yotjihungiriro pokati komahi ayeevari nga.
Okuza ko 2015 otjipekara ovihungiriro ihi ohunga nOtjiṱiro Otjindjandja, Ondjesiro nOtjisuta. Umue wouzeu nOJD onḓengu yotjimariva, ozOeuro omangete 1100 (ape Ozondora za Namibia omatau o-18) ohoromende yEhi rOvandoitji, ndji ya kekera oviungura novitjitwa vyondungiro nomekurisiro woviwaṋa mbya ihamisiwa i yohuurire yEhi rOvandoitji.
Tjarwe, oviwaṋa ovingi mbya yara OJD tji vi ha ri nohange nayo okookutja OJD ya tandwa kutja otjimariva hi ootjitenga nootjisenina koviwaṋa mbi kanaa pe ka kara tjarwe.
Nambano mOJD ndji maku zu ya ṱunwa mombii ndji, oviwaṋa mavi yenene okuningira ombatero yarwe.
Pu mape hee kutja okuningira uriri kape nongwizikiro ongurame nongarerere kutja eningira poo omaningiro wawo wombatero yarwe pendje notjimariva tji vya kekerwa maye yakurwa.
Ondjemeno yarwe ohunga nOJD ozondekurona zOtjiṱiro momahi wozonganda tjimuna Otjawaṋa na South Afrika.
Nḓa paterwa pendje muyo. Nu ngamba nḓeri pendje, pendje na indu tji za kotoka kOnamibia. Poo tji maku zu maze pwire mOmbwiko ndji mai sembamisiwa. Pendje na nao kape na tjarwe tjotjivara ohunga nomaṱunino wOJD kutja i pwire ozondekurona katjotjiri.
Momayandero wombura ndja zuko momuezeTjitarazu, Okomiti yOzondjiwe yOhoromende mOvihungiriro vyOtjiṱiro Otjindjandja, ya ri notukosi twondjivisiro ohunga nOJD nomuano mbu maku zu ya ṱununinwe.
Ozombara zOvaherero nOvambanderu ze rihumbururire notukosi hwi amaze tja ozo zeri pongurameno yazo kutja OJD okuza kotjimemenwa tjayo kandji ri yo nu kandji nomazengururiro omakarere nombwiro kOtjiṱiro Otjindjandja nOtjisuta.