Uuministeli wuushitwe owa ti omulumentu ngoka a lika kongandu kokwaako ita futwa kuuministeli oshoka oye a hindi ongandu, omanga a kala nokugandwa. 

Okwa lopotwa omulumentu gomimvo dhopokati a lika kokwaako kokolumoho Olyomakaya miipathi yaantu oyendji sho kwa li ta kambandhala okudhana nongandu nonando a kala nokugandwa a ze po. 

Omulumentu ngoka anuwa ngaashingeyi oku li monkalo yi li nawa nokwa lalekwa mo moshipangelo. 

Omugandji gomauyelele muuministeli wuushitwe Ndeshipanda Hamunyela okwa ti nakulika oye a hindi ongandu. 

“Omulumentu ngoka okwa kala nokuhinda ongandu, ta kambadhala okudhana nayo osho wo oku yi kuutumba, omolwaayihe mbyoka ita vulu okufutwa,” ta fatulula ngaaka. 

Hamunyela okwa kumagidha oshigwana shi kale tashi lopotele aanambelewa ye na uunongo wokuungaunga niinamwenyo ya yooloka uuna ye yi mono momidhingoloko dhawo, ihe haku yi guma. 

Ngoloneya gwoshitopolwa shaMusati Erginus Endjala okwa kumagidha oshigwana shi kale aluhe shi li uupathi uuna tashi kwata oohi mondama oshoka omu na oongandu. 

“Kehe gumwe na kale omupolisi okulopota mbala uuna kwa monika ongandu mokati koshigwana opo yi kuthwe mo mbala,” ta kumagidha ngaaka. 

Ta ti, oongandu otadhi zi mo momeya okukonga iikulya, onkene ngele odhe ya mokati kaantu otadhi ya monitha oshiponga. 

Kansela gwoshikandjohogololo Onesi Festus Petrus okwa ti, omulumentu ngoka a lika oye a hindi ongandu oshoka oya kala nokugandwa kopolisi yaa dhane nongandu, ihe ota yamukula kutya oye ngaa e shi okulika mokati kayakwawo. Ta hokolola kutya omulumentu ngoka okwa li a tsikile, ta kambadhala okukuutumba kombanda yongandu, e ta ponokelwa. 

Ta ti, aanambelewa okuza kuuministeli wuushitwe okwa li ya dhipaga ongandu ndjoka. -vkaapanda@nepc.com.na