EPUKIRO Muwapayiki goSWAPO momukunda gwaEpukiro Muueze Ndjavera kahundilire nompitisili dombunga politika SWAPO vahingire vagusepo udigu ou wuna kara mokatji kawo momukunda howero gwaOtjombinde.Apa katambwire vagenda ava kagendesere presidente gona goSWAPO kamarada Hifikepunye Pohamba,age kava tambwire pomberewa gomunamberewa ozo. Ndjavera kuna kuyigazara asi udigu ou nsene kapi vana kuugusapo kuvhura yilifane neyi yahorokere moOtjombinde,omu mbunga zaSWAPO zazumbanesa mahoroworo morwa vantu kwahorowere mbunga peke morwa kwalinyenga -nyenga pomarudi,yipo nye asi vampitisili wo Epukiro kuna kuyimona asi eyi kuvhura yiya sike mwawo.Ndjavera kahundilire asi yitundwamo eyi zaya gwana mbunga zekona kono ezi gapitisilire kamarada Asser Kapere vahepa kuyibubura ntani vayiture moyirugana.Mbunga ozo vadiva asi mbunga zaKapere vakamene kukonakona yiyo vagava yitwamo yawo kopolitbiro kupitira mwahamutjangantoni gombunga zaSWAPO. Nampili ngomu asi mbunga zontjima-ntjima zoSWAPO vazi tanterereko nye dogoro ngesi kwato eyi varuganako.Ndjavera katente asi yeyi yahoroka moOtjombinde yiyo ngayihoroka moEpukiro nsene asi udigu ou kapi vana kuugusapo.Age katente asi vantu kapi vahaferere Willie Hoveka makura yiyo vazire nye vakahorowore kandindate gwaSWANU yiyo yatwaredera SWAPO azumbanese mahoroworo goukansela.Vambenderu ava vana kara asi yiwo vanzi momukunda gwina ndi asi yiwo vahamena koSWAPO moEpukiro nomoOtjombinde ngesi vana ligaunuka monombunga mbali vamwe vahompa gomukondi Munjuku Nguvauva ano ava vamwe esimbi kurona Erastus Kahuure.Awo kuna kuyigazara asi nongwami daKahuure kwatokwere asi kapi tava horowora Willie Hoveeka morwa age muholi zaNguvauva.Yipo nye vatokwere asi ngesi vahepa kuhorowora kandindate gwaSWANU Matti Ndjoze,ogu gaya funda mahoroworo ogo.Apa tuna kuuyunga ngesi Otjombinde yilyo lyelike evango lina kara asi mwato nombunga degendeso doSWAPO. Muwapayiki goSWAPO momukunda Omaheke kamarada Festus Ueitele katente asi awo simpe kuna kundindira vavape nonkondo asi vature nokomitiye odo momukunda gwina ntani navavhura kuyirugana oyo.Ano mbudi ozo zahepa Kutunda konompitisili depeguru.Gumwe gakaramo katente asi udigu ou waOtjombinde vahepa kuutara nawa morwa maruha nagenye mulyo kombunga politika.Mpito ezi zina karapo ngesi zongwa ntudi kuhundira tupu Nguvauva naKahuure valigusirepo.Presidente Pohamba ogu kakere nomudingu gopaveta momukunda gwina kayitambwire asi navaruganako yuma.Koruha rwendi kahundilire vagendesi womukunda gwina asi matokoro gokongress zo2002,gaze moyirugana unene gokutanta asi vakadi nawo vakare moumpitisili woSWAPO.Vahepa kuyitura moyirugana asi vakadi nawo vakare momapongo gawo nokuvapa mpito vauuyunge yipo nawo ngava kamoneke kokongress ezi zina kuwiza momvhura ezi. Posiruwo sooso nompitisili donope domukunda horowere yipo kava dilikidire kombunga ndi unene po kwa presidente gona goSWAPO.Awo simpe kooko koEpukiro Pohamba yiyo kagwanekerere naNguvauva. Ehudi kasi kere sigongi sokulizedilira.Nye nampili ngoso katuvekeko nakauke asi vantu ava kava likundire yokuhamena udigu wovantu vatunga momuknda gwina nepiro kira nsene asi muntu ana dogoroka.