Aavali otaya nyenyeta kutya inaya manguluka we okuthiga aanona momagumbo naakwanezimo oshowo aaniilonga.
Oya li ya nyenyeta ngaaka okupitila komalungula oshowo miikundaneki ya yooloka sho kwa li kwa lopotwa omakwatokoonkondo ogendji mehuliloshiwike.
Opolisi moshitopolwa shaMusati oya lopota omusamane gwomimvo 57 a kwatwa okanona komimvo heyali koonkondo.
Omukuluntu gwopolosi moshitopolwa shaMusati Ismael Basson okwa ti oshingwanima shoka osha holoka momukunda Ontanda A moshikandjohogololo Otsandi.
Otaku hokololwa kutya omusamane ngoka okwa li a kala e li kondje sho a li i imbooloha mondholongo sho kwa li ta tamanekelwa natango ekwatokoonkondo.
“Omusamane ngoka ha longo ongomuniilonga gwomegumbo lyopuushinda okwa li anuwa a ka tala okanona kaandjawo e ta yi nako mondunda ye noku ka kwatwa koonkondo,” ta hokolola ngaaka.
Omusamane okwa mangwa po kopolisi.
Natango okanona komimvo omugoyi anuwa oka kala nokukwatwa koonkondo kuhekulu uule woomwendhi hamano.
Basson okwa ti oshiningwanima shoka osha holoka momukunda Ongungila moshikandjohogololo Etayi.
Nakufekelwa oshiningwanina shika ina mangwa po natango nomakonakono gopolisi oge li metifa.
Oshiningwanima shimwe sha faathana osha holoka momundhingololoko gwoRuacana, sho okakadhona komimvo 14 ka kwatwa koonkondo kaalumentu yaali ethimbo limwe.
“Aalumentu mboka oya tilitha okakadhona hoka kutya otaye ka dhipaga ngele oke shi popi,” ta popi ngaaka.
Omugandji gomauyelele mUuministeli wokakwashikekookantu Lukas Haufiku okwa li a fatulula kutya omakwatokoonkondo ohaga holoka nomatompelo ga yooloka, sha ikolela kwaamboka haya longo iilonga mbyoka yi nyanyalaleka, shoka sha kwatela mo ongeyo, oonkondo oshowo mboka yu uvite taya vulu okulongela aantu shoka ya hala.
Ta ti, shoka otashi vulu okushonopala nenge okuhula po uuna oshigwana tashi tsikile okulongwa nokufatululilwa kombinga yuuthemba wawo, nokutseya shoka ye na okuninga uuna ya longelwa omiyonena dholudhi ndoka.
“Oshigwana nashi holole omakwatokoonkondo oshinima kaashi li mondjila pomahala agehe kutya okiilonga nenge omomagumbo,” ta fatulula ngaaka.
Oshigwana nashi hulithe po okutala ko omakwatokoonkondo ongoshinima osho shi na okukala, oshowo okugandja oombendhi kwaamboka ya ningilwa omiyonena.
Ta fatulula kutya ngele gumwe ha ningilwa omahepeko ngoka oto vulu okumundhimbulula momayihumbato ge, onkalo oshowo eholokopo lye uuna te ya pokati kaantu.
Ya ti, ngoka e na uudhigu wu li ngaaka ihe ota nyengwa okuthika koosasiona dhopolisi na dhenge konomola 106 nenge 611 oshali shamuhongi.
Omuhingimwenyo muuministeli wuundjolowele nonkalonawa Josephine Apoopawa Kapweya okwa ti, omalongo kombinga yomakwatokoonkondo oga pumbwa okunkondopalekwa.
“Aapolisi oshowo omahangano ga yooloka oga pumbwa okumanga uukumwe okulwitha omakwato koonkondo kaaga holoke momindhingoloko dhawo,” ta ti ngaaka.
Ta gwedha po kutya onkalo ndjoka oya nyayikila, uuna gumwe a kwatwa koonkondo onkalo yomuntu ohayi lunduluka, ihayi kala we ya faathana.
Ta ti, oshilalo shoka uuna sha holoka momuntu ihashi polo.
Omakwato koonkondo oga pimbila noonkondo, kehe esiku oopolisi otayi lopota omakwato koonkondo taga ningilwa aantu okuza kaanona sigo aakaluntu.
- vkaapanda@nepc.com.na