Kleopas Nghikefelwa 

ONANDJOKWE - Onandjokwe Medical Museum opamwe novapangi vakulu moshipangelo shaNandjokwe osho ova dimbuluka efiku laSelma Rainio “Gwanandjokwe”. 

Dr. Selma Rainio – Gwanandjokwe –ngaashi a shivika nawa, oye omutotipo woshipangelo shaNandjokwe, noku li yoo ondohotola yotete yomukainhu moNamibia noshoyo koshilongo shavo koSuomi.

Efiku eli ola towa po onga ediladilo lambushe Kuku Selma Shejavali “Gwanandjokwe”. Shaashi Dr. Rainio oha dalwa mo21 Maalisa, mefiku hali dimbulukiwa emanguluko loshilongo okwa faneka efiku lokudimbulukwa edalo laye li kale hali ningwa mo22 Maalisa.

Shejavali okwa eta po ediladilo opo efiku eli li kale hali kwatelwa komesho koombushe vaSelma, unene ovanyasha, vo va kale nokuunganeka oinyangadalwa tai tange ondjokonona yambushe wavo.

Okwa indila yoo ovapangi vakulu va fikola nova longa mOnandjokwe, va kale yoo hava mono okamhito kokudimbuluka efiku olo letoto nokutwala ondjila youhaku kolutenda monooli. 

Otaku indilwa nefimaneko opo ooSelma aveshe ile ookaume ava ve na ohokwe yoku ka kala hava fimaneke efiku ledalo lakuku Rainio, va kwatafane nOnandjokwe Medical Museum ile naKuku Shejavali.