Opolisi moshitopolwa shaShana oyi li molukongo lwomulumentu a yi ontuku sho a li a adhika nomahooli shaa li paveta mOshakati.

Omupopiliko gwopolisi moshitopolwa shaShana Thomas Aiyambo okwa ti, opolisi oya li ya pondola okumanga po omulumentu gumwe ngoka kwa li ta landitha pamwe namukwawo.

Ta ti, omandini ge li 35  oga mangwa po kopolisi,  kehe limwe olyi na oolitela 25 nalimwe olyi na oolita 20, gongushu N$14 041.80, sho opolisi ya li ya hadha megumbo moka.

“Megumbo moka okwa li mwa adhika natango iimaliwa koomuma yi li N$15 769, omandini kage na sha, ge li 23 goolita 25 oshowo endoloma kaali na sha lyoolita 200,” ta ti ngaaka.

Aiyambo ta ti, oya li ye shi pondola okukwata omufekelwa ngoka sho kwa li opolisi yomoshitopolwa shaShana tayi patolola nelalakano lyokukeelela iimbuluma moshitopolwa.

Nonando omakonaakono oge li metifa natango, opolisi otayi fekele kutya omahooli oga li  ga yakelwa moshilongo okuza koAngola.

Omufekelwa nguka okwa li a adhika kee na omukanda gokulanditha omahooli nenge ombapila tayi ulike kutya oku na uuthemba wokulanditha omahooli gomiihauto.

“Kehe ngoka e na uuyelele kombinga yomahooli taga landithwa kaashi li paveta, na lopotele opolisi mendeelelo,” ta indile ngaaka.

Omahooli ga za moAngola inaga pitikwa moNamibia oshoka otaku ti inaga dhindwa, go ohaga pungulwa momandoloma ga nika oshiponga go otaga  kakeke ewangandjo nokulandithwa momukalo inaagu uka ngele tashi ya kuundjolowelele womuntu.

Omupeviminista gwiikwamina noonkondo dholusheno Kornelia Shilunga omumvo 2019, okwa li a gandja omawuyelele nomatompelo gomahooli ngoka kaaga landithwe moshilongo.

Okwa popile ta ti, aanangeshefa mboka ye na omikanda dhokulanditha omahooli moNamibia otaya nyenyeta kutya oongeshefa dhawo otadhi shunithwa monima kwaamboka kaye na oombapila okulanda nokulanditha omahooli okuza  moAngola shoka tashi etitha oongeshefa dhawo dhi pate nokukanithitha aakwashigwana iilonga.