RUNDU - Ministeli zeyi yomonda zosirongo ngesi vanaturapo elikwamo lyokutuma SMS nsene ono hara kupura efano lyoge nsene asi kwakufaneka, elikwamo eli lyokuturamo ehundiro kwalitulisapo mokuwapukurura egawo yirugana kovantu. 

‘’ Eyi kuna kara simwe somutaro twatulisapo kumwe nokampani zaMTC yimo ana kutanta muhuyungilipo ministeli Margaret Kalo. 

Vantu vaturamo ehundiro lyefano lyaNamibia ngavagwana nosms konofunguna zawo apa ngayi kara asi ehundiro olyo vana lipulisire ntani asi efano olyo nare vana mana kulirugana kuna kundindira tupu asi vahepa kukaliharako. 

Nampili ngomu yina kara asi age kapi kageve sivaro asi gangapi vana kara nago ngesi, ministeli kuna kara asi nelikwamo nye eli lyonosms nalininkisa vahundili vasesupike rugendo, ntani kapi navakakara hena momukweyo omu navakazura hena komberewa zawo kapisi hepero asi vantu vawize komberewa, mokuyapura ehundiro lyawo asi efano lyendi muntu lina pu ndi simpe. 

‘’Mokugwedako, mosiruwo esi somukisi ogu goCovid-19, nayihoroka mukugwana mukisi ogu. 

Mutulimo mahundiro, ngagwana sms zina kutunda ko 10001 zina kumupukurura yimo ngoso katente Kalo. 

Vahundili ava ngavaturamo mahundiro vahepa kugava nonomora douhunga makura vahepa nye kuhageka vaze komberewa asi tavakapurako pwavene, nye vahepa kundindira dogoro vagwane mapukururo konofunguna dawo. 

Mbudi ozo ngatuzituma pwahana kukara epuro nkenye lyomuhundili. 

Ose hena ngesi kuna kutantera vantu asi komeho oko tuna kuza, vatulimo mahundiro vahepa kutuma tupu sms. 

Eyi ngayihorako ngayihorako kuruganesa yimaliwa yoyinzi yoministeli. 

Ministeli kuna kuruganesa siruwo esi mokupandura MTC ava vaninka sirugana esi sikare vasigwane vaNamibia ngomuhoko vahana kufutako Yuma. 

Ose kuna kuyimo eyi asi kuvhura tuze komeho nokuretesapo mauwa mokuruganena kumwe.