Taimi Haihambo
Ongwediva – Omukulunhu woshiputudilo shopombada shehongo International University of Management David Namwandi, okwa ti oshikefa shaye shedina David Namwandi Trust Fund otashi yandje oshimaliwa kovanyasha opo tava di mofikola va dule okutameka eengeshefa.
Pefimbo a li ta yandje omaano kounona ovo ve li monghalo ya nyika oluhepo momudingonoko waKapya, Namwandi okwa ti oshikefa shaye otashi tale ovanafikola ovo va mana elihongo lavo koiputudilo yopombada koUnam, Nust, IUM, naaishe oyo ya talika ko kepangelo laNamibia, ndele kave na oilonga.
Namwandi okwa popya yoo kutya elalakano lokuyandja oshimaliwa shokutota po ongeshefa, okuyandja ashike eemhito doilonga kovanyasha ovo va pita moiputudilo ndele kave na eemhito doilonga opo va dule okulikwafa pamwe neefamili davo. “Itatu yandje shaashi twa hala okupandulwa, ohatu yandje shaashi twa hala okuvatela,” Namwandi ta tumbula. Ovanhu ovo tave ke lihanga va pewa oshimaliwa ndee eengeshefa davo tadi ende nawa, ohava alula nee omwaalu woimaliwa oyo va pewele okutamekifa ongeshefa yavo koshikefa nongeenge inashi enda nawa, ku na eshi hofutu.
Namwandi ta ti eemhito doilonga moNamibia oda pumba shaashi eliko loshilongo nalo otali shongola. Okwa weda po yoo kutya keshe umwe moNamibia oku na oshinakuwanifa shokukufa ombinga mokweeta po nokuyandja oilonga kwaavo va mana elihongo lopombada ndee kave na oilonga. Eshi osha kwatela mo nee keshe tuu oo ta dulu okuyandja oilonga shiha kale ashike oshinakuwanifwa shepangelo. Kakele keengeshefa, ominista ikulu yehongo ei oya ti natango keshe odula oshikefa shaye ohashi yandje oimaliwa yokulihongifa ovanafikola ve li 20, ovo va hala okufikola moshiputudilo shopombada sha-IUM.
Nonande Namwandi e li longekida okuyandja oimaliwa okukwafela ovanafikola ve li koiputudilo, natango okwa yanda omaano oinima ya konda peedola N$70 000 olomakaya momukunda Okapya, moshitopolwa shaShana. Omaano aa okwa li mu na omidjalo dofikola dounona ovakwanaluhepo va hoololwa onhomenawina meefikola deepilima di li nhano, oikutu younona ve li peedula 1-6, oshoyo oikutu yoomeme nootate vopomukunda Okapya. Okwa kundanekwa kutya ounona vofikola vamwe ova dja keefikola oko ha fikola kwa li. Okwa weda po yoo kutya itava tale ashike ounona vokoshitukulwa shaShana shaashi oko a dja okwe lilongekida oku vatela Namibia alishe koonono.
Omukulunhu wehongo moshitoplwa shaShana Hileni Amukana, oo naye a i poshitufi sheyandjo lomaano okwa tumbula kutya ounona vofikola va fika pomwaalu 15 000 otava mono oixuna koluhepo. Okwa weda po kutya omwaalu wounona ava uhapo eefiye, vamwe ove li moumaumbo naakulupe, voo vakwao ohave lifile oshisho voovene notava xupu noudjuu. Amukana okwa lilila yoo Namwandi ngeenge ota dulu okuhoolola ounona nande kamwe ilo vavali kofikola yoRukonga Vision oyo ya kundanekwa haipiti nawa, ngeenge ota dulu oku va ihongifa oshali, omo Namwandi a nyamukula kutya ota kala ha kufa ko ovanafikola vavali keshe modula.