Oosikola ndhoka dha kala dha pata omolwefundja otadhi ka tsikila nootundi ethimbo lyefudho osho wo momasiku kaage shi gosikola, uuna omeya ga lota.
Ndhoka okwa li dha popiwa komunambelewa omukuluntu gwelongo, koshikondo shomathaneko nomayambulepo moshitopolwa shaShana, Fenni Mwila, sho a li ta gandja uuyelele kombinga yonkalo yomeya gefundja. "Shoka otashi ka ningwa okufutila po omasiku ngoka aanona ya kala ye li momagumbo, oshoka aanona oya kala po miilongwa yawo,’’ ta popi ngaaka.
Ta gwedha po ta ti, shoka sha kalitha po aanona omanga ye li komagumbo, osho kapwa li pe na nkene aalongwa mboka taya vulu okupewa omalongo okupitila moonkambadhala dhilwe.
Mwila okwa totha mo kutya oosikola dhi li 12 okwa li dha pata mOshitopolwa shaShana ihe dhi li heyali dhomudho ngaashingeyi odha tameka nootundi.
“Aanona ye li 3 119 okwa li ya kalekwa komagumbo, ye li 1 836 oya tameke okuza petameko lyoshiwike shika omanga ye li 1 283 natango ye li komagumbo,” ta popi ngaaka.
Ta gwedha po ta ti, mboka ya tameke osikola oomboka omeya ga shuna pevi momindhingoloko dhawo, omanga mboka ye li komagumbo ya tegelela omeya ga shune pevi.
Okwa popi wo kutya onkalo yomeya otayi ende yu uka pevi, noosikola odhindji odha tegelelwa dhi kale dha tameka nootundi miiwike twa taalela.
"Aalongwa ye li momihandjo moka haya zi komahala ge na omeya okwa li ya pewa epitikilo ya kale momihandjo omolwaondjila dha teka po komeya.
Onkene ngele onkalo oya tsikile uuministeli welongo otau ka tseyitha ngele ompango ndjoka otayi tsikile nenge olweetho lwa landula otaya ka pitikwa ya ye komagumbo,’’ Mwila ta ti ngaaka.
Okwa kumagidha wo aakuluntu ya tsikile okusila aanona oshimpwiyu oshowo oku ya kumagidha kaaya dhane omeya, opo ku handwe omaso gomeya. Ta ti, oosikola sho dha tameke, itashi ti omeya oga ya, aanona naya thindikilwe nokutegelelwa okuza koosikola.
Okakomitiye taka ungaunga nefundja moshitopolwa shaShana oka pititha kutya onkalo yomeya gefundja otayi ende tayi hwepopala, ashike kiikandjohogololo yimwe natango omeya otaga tondoka.
vkaapanda@nepc.com.na